حال ہی میں پاکستان کے صوبے پنجاب کے شہر لاہور میں ملک کی پہلی بجلی پیدا کرنے
والی سڑک مکمل کر لی گئی ہے اور اسے پاکستان کی سب سے جدید سڑک قرار دیا جارہا ہے-
حکام کے مطابق یہ جدید سڑک لاہور شہر کے وسط میں واقع ہے اور اسے روٹ 47 کا نام دیا
گیا ہے- اس سڑک کی لمبائی 4.5 کلومیٹر ہے جو کلمہ چوک کو بشمول فیروز پور روڈ،
گلبرگ مین بلیوارڈ، والٹن روڈ اور لاہور رنگ روڈ سمیت شہر کی کئی بڑی شاہراہوں کو
جوڑتی ہے۔
اس سڑک کی تعمیر پر آنے والی لاگت کا تخمینہ 9 ارب روپے تھا جبکہ اس منصوبے یو
پنجاب سنٹرل بزنس ڈسٹرکٹ ڈویلپمنٹ اتھارٹی (سی بی ڈی پنجاب) نے انجام دیا۔
سی بی ڈی پنجاب کے سی ای او عمران امین کے مطابق سڑک ملک کے جدید ترین تجارتی ضلع
کا مرکزی بلیوارڈ ہے، یہ بین الاقوامی معیارات پر پورا اترتی ہے اور اس میں کئی
اسمارٹ خصوصیات شامل ہیں۔
اس سڑک میں تقریباً ایک کلومیٹر کا فلائی اوور شامل ہے، اس میں پیدل چلنے والوں اور
سائیکل سواروں کے لیے الگ الگ لین ہیں۔
حکام کا یہ بھی کہنا ہے کہ سڑک کو بارشوں کے دوران پانی کے جمع ہونے سے روکنے کے
لیے ڈیزائن کیا گیا ہے۔ روٹ 47 کے ساتھ فٹ پاتھوں پر سولر پینل لگائے جا رہے ہیں جو
سایہ فراہم کریں گے اور ایک میگا واٹ تک بجلی پیدا کریں گے۔