پاکستان کی صفِ اوّل کی اداکارہ یمنیٰ زیدی نے فوٹو اینڈ ویڈیو شیئرنگ ایپ انسٹاگرام پر اپنے فالوورز کی تعداد ایک کروڑ ہونے پر خوشی کا اظہار کیا ہے۔
فالوورز میں اضافے کی خوشی میں یمنیٰ زیدی نے انسٹاگرام اسٹوری کے ذریعے ایک خوبصورت پیغام شیئر کیا۔ اداکارہ نے اپنی اسٹوری میں لکھا کہ کچھ برس قبل میں نے خوشی کا ایک بیج بویا تھا اور اب میں محبت، احترام اور خوشیوں کا ایک باغ اپنے پاس رکھتی ہوں۔
یمنیٰ زیدی نے اپنے مداحوں کو پھولوں سے تشبیہ دیتے ہوئے اُن کا شکریہ ادا کیا اور کہا کہ میرے انسٹاگرام کے باغ میں ایک کروڑ خوبصورت پھولوں کے لیے سب کا شکریہ۔
یمنیٰ زیدی کا شمار پاکستان کی صفِ اوّل کی اداکاراؤں میں ہوتا ہے۔ اُن کے مقبول ڈراموں میں دل ناامید تو نہیں، ڈر سی جاتی ہے صلہ، پری زاد، صنفِ آہن، پیار کے صدقے اور یہ رہا دل شامل ہیں۔ ڈراموں میں بہترین اداکاری کے جوہر دکھانے کے بعد یمنیٰ زیدی فلم ’نایاب‘ کے ذریعے بڑی اسکرین پر بھی اپنی پرفارمنس کے جوہر دکھا چکی ہیں۔
بعدازاں، 2023 میں نشر ہونے والا مقبول ترین ڈراما تیرے بن، اُن کی مقبولیت کو نئی بلندیوں پر لے گیا، جس نے ٹی آر پی کے ریکارڈ توڑ دیے اور نہ صرف پاکستان بلکہ دنیا کے دیگر ممالک میں بھی بےحد پذیرائی حاصل کی۔