سہراب گوٹھ میں مزاحمت پر شہری کو زخمی کرنے والے 2 ڈاکوؤں کو عوام نے زدوکوب کرنے کے بعد پولیس کے حوالے کردیا۔
ایسٹ پولیس کے مطابق 2 ملزمان نے تھانہ سہراب گوٹھ کے علاقے سندھ سوسائٹی لاسی گوٹھ کے قریب مرغی سپلائر شاہد ولد امان اللہ کو واردات کے دوران مزاحمت پر فائرنگ کرکے زخمی کیا اور فرار ہونے کی کوشش کی۔
اس دوران مشتعل ہجوم جمع ہوگیا اور ملزمان کو پکڑ کر تشدد کا نشانہ شروع کردیا، پولیس نے بروقت دونوں ملزمان کو حراست میں لے لیا۔
زخمی حالت میں گرفتار ملزمان کی شناخت پوڑھو ولد محمد بچل مگسی اور ممتاز ولد جان محمد مگسی کے ناموں سے ہوئی، ملزمان سے غیر قانونی اسلحہ بمعہ ایمونیشن، 2 موبائل فونز اور نقد رقم برآمد کی گئی۔
زخمی شہری اور گرفتار ملزمان کو طبی امداد کے لیے اسپتال منتقل کردیا گیا، پولیس کے مطابق ملزمان کا کرمنل ریکارڈ تلاش کرنے کے ساتھ ضابطے کی کارروائی عمل میں لائی جارہی ہے۔