وفاقی دارالحکومت کے شہریوں کے لیے مفت انٹرنیٹ کی سہولیات بڑھانے کے منصوبے کے تحت حکومت نے دسمبر 2025 تک شہر میں 30 مفت وائی فائی ہاٹ سپاٹ نصب کرنے کا فیصلہ کیا ہے۔
نیشنل ٹیلی کمیونیکیشن کارپوریشن نے یہ بریفنگ قومی اسمبلی کی قائمہ کمیٹی برائے آئی ٹی کو دیتے ہوئے بتایا کہ منصوبے پر تیزی سے کام جاری ہے اور مقررہ مدت تک یہ سروس مکمل طور پر فعال ہو جائے گی۔
حکام کے مطابق مفت وائی فائی ہاٹ سپاٹس اسلام آباد کے اہم عوامی مقامات، مارکیٹوں، پارکوں اور سرکاری عمارتوں کے قریب نصب کیے جائیں گے تاکہ شہریوں، طلبہ اور ملازمین کو تیز رفتار انٹرنیٹ تک مفت رسائی حاصل ہو سکے۔
این ٹی سی کا کہنا ہے کہ ادارہ ملک کے 100 سے زائد شہروں میں 3 ہزار سے زیادہ سرکاری و نجی اداروں کو ٹیلی کمیونیکیشن اور سائبر سیکیورٹی خدمات فراہم کر رہا ہے جبکہ یہ منصوبہ اسلام آباد کو ٹیکنالوجی فرینڈلی شہر بنانے کی جانب اہم قدم ثابت ہوگا۔