اینٹی نارکوٹکس فورس نے ملک کے مختلف شہروں اور تعلیمی اداروں کے اطراف منشیات فروشوں اور اسمگلروں کے خلاف پانچ کارروائیاں کیں۔ ان کارروائیوں کے دوران مجموعی طور پر 390.52 کلوگرام منشیات برآمد ہوئی جس کی مالیت 46 کروڑ 53 لاکھ روپے سے زائد بتائی جاتی ہے اور دو ملزمان کو گرفتار کر لیا گیا۔
مانسہرہ میں قراقرم ہائی وے روڈ کے قریب ایک ملزم کو گرفتار کیا گیا جس کے قبضے سے 400 گرام چرس برآمد ہوئی۔ گرفتار ملزم نے دوران تفتیش اعتراف کیا کہ وہ تعلیمی اداروں کے طلباء کو منشیات فراہم کرتا رہا ہے۔
کراچی کے ایک کوریئر آفس میں برطانیہ بھیجے جانے والے پارسل میں 124 گرام ہیروئن برآمد ہوئی۔ لاہور میں ہسپتال کے قریب ایک ملزم کے قبضے سے 2 کلوگرام آئس برآمد ہوئی۔ پشاور کے کوریئر آفس میں ساہیوال بھیجے جانے والے پارسل سے 1 کلوگرام آئس برآمد ہوئی۔ علی زئی، ضلع پشین میں بڑی کارروائی کے دوران 387 کلوگرام ہیروئن برآمد کی گئی۔
اے این ایف کے ترجمان نے بتایا کہ تمام کارروائیوں میں ملوث ملزمان کے خلاف انسداد منشیات ایکٹ 1997 کے تحت مقدمات درج کیے گئے ہیں اور مزید تحقیقات جاری ہیں۔