وزیر اعظم عمران خان کی بہن علیمہ خان پر الزام کیا ہے؟

وزیر اعظم عمران خان کی بہن علیمہ خان ان دنوں خبروں میں ہیں۔ سپریم کورٹ کے چیف جسٹس ثاقب نثار نے ان کی دبئی میں جائیداد کے حوالے سے ازخود نوٹس لے رکھا ہے۔ جمعرات کو سپریم کورٹ میں علیمہ خان کے مقدمے کی سماعت ہوئی۔ بی بی سی نے یہ جاننے کی کوشش کی ہے کہ علیمہ خان کے خلاف الزام کیا ہے اور ان کا الزامات پر مؤقف کیا ہے؟
 

علیمہ خان پر الزام ہے کیا؟
وزیر اعظم عمران خان کی بہن علیمہ خان پر الزام ہے کہ اُنھوں نے دبئی میں اپنی جائیداد کو انکم ٹیکس کے گوشواروں میں ظاہر نہیں کیا تھا۔

اس سال جون جولائی میں شروع کی جانے والی ایمنسٹی سکیم سے اُنھوں نے فائدہ نہیں اٹھایا۔ معاشی امور پر نظر رکھنے والے صحافی شہباز رانا کے مطابق اگر علیمہ خان نے اس سکیم سے فائدہ اٹھایا ہوتا تو وہ صرف اپنی جائیداد کا دو سے تین فیصد رقم ادا کر کے اپنی جائیداد کو ریگولیرائز کرواسکتی تھیں لیکن اُنھوں نے ایسا نہیں کیا۔
 

علیمہ خان کا مؤقف
وزیر اعظم کی بہن نے ابھی تک تحریری طور پر اپنا جواب تو عدالت میں جمع نہیں کروایا لیکن ایف بی آر کے حکام کا کہنا ہے کہ علیمہ خان کا مؤقف تھا کہ اُن کے وکیل نے مشورہ دیا تھا کہ وہ اس جائیداد کو ظاہر نہ کریں کیونکہ ایسا ہونے کی صورت میں بھاری جرمانہ عائد ہوسکتا ہے۔ چیف جسٹس نے علیمہ خان کی جائیداد سے متعلق از خود نوٹس لیا ہے اور ایف بی آر سے اس بارے میں تفصیلات بھی طلب کی ہیں۔

ایف بی آر کا مؤقف
ایف بی آر کے حکام کا علیمہ خان کی جائیداد کے بارے میں کہنا ہے کہ اُنھوں نے بیرون ملک اپنی جائیداد کو ریگولرائز کروانے کے لیے جائیداد کا 25 فیصد حصہ جرمانے اور ٹیکس کی مد میں ادا کیا ہے۔ حکام نے علیمہ خان کی جائیداد کی ملکیت نہیں بتائی اور نہ ہی یہ بتایا ہے کہ ٹیکس اور جرمانے کی مد میں کتنی رقم سرکاری خزانے میں جمع کروائی گئی ہے۔ حکام کے مطابق علیمہ خان کے ٹیکس کی ادائیگی کا معاملہ ایف بی آر کے ہیڈ کوارٹر میں نہیں بلکہ لاہور میں ریجنل ٹیکس لاہور میں ہے۔

علیمہ خان کی بیرون ملک جائیداد چھپانے کا معاملہ کب سامنے آیا؟
یہ معاملہ اس وقت سامنے آیا جب سپریم کورٹ نے پاکستانی شہریوں کے بیرون ممالک کے بینکوں میں اکاؤنٹس اور جائیدادوں سے متعلق از خود نوٹس لیا تھا۔

ایف آئی اے نے اس بارے میں آٹھ سو سے زیادہ پاکستانیوں کی ایک فہرست عدالت میں پیش کی تھی جن کے نہ صرف بیرون ملک بینکوں میں پیسے پڑے ہوئے ہیں بلکہ جن کی دبئی اور دیگر ملکوں میں جائیدادیں بھی ہیں۔ ایف آئی اے کے حکام کے مطابق اس فہرست میں علیمہ خان کا نام بھی شامل ہے جن کا دبئی میں ایک فلیٹ ہے جس کا ذکر اُنھوں نے اپنے انکم ٹیکس کے گوشواروں میں نہیں کیا تھا۔

ایف آئی اے کی نئی فہرست کے مطابق گیارہ سو سے زیادہ افراد کی بیرون ممالک جائیداوں کے بارے میں انکشاف ہوا ہے۔