|
عبداﷲ شاہ غازی ؒ کا عرس ہر سال20 سے22 ذوا لحج کو سالوں
سال سے منایا جا تا ہے۔ ان کا مقبرا کراچی کے ساحل سمندر کلفٹن میں واقع ہے۔
ان کے بھائی سید مصری شاہ کا مقبرا بھی تھوڑے فاصلے پر ساحل سمندر کے قریب
میں واقع ہے۔ عبداﷲ شاہ غازی کا مقبرا پورے پاکستان میں مشہور ہے۔ ان کا
مقبرا بھی سندھ کے دوسرے بزرگوں کے مقبروں کی طرح بہت ہی خوبصورت ہے۔ ان کے
عرس میں عقیدت مند مسلمان سارے سندھ اور ملک کے دوسرے علاقوں سے بڑی تعداد
میں شرکت کے لیے حاضر ہوتے ہیں ۔اس عرس میں مسلمانوں کے علاوہ دوسرے مذاہب
کے لوگ بھی بڑی تعداد میں حاضری دیتے ہیں۔ اصل بات یہ ہے کہ اﷲ کے نیک
بندوں نے اپنے وطن سے دور اس وقت کے ہندوستان کے کفرستان میں اﷲ کے دین کو
پھیلانے کی غرض عرب کی سر زمین سے تشریف لائے اور دین اسلام کی تبلیغ کی
اور لوگوں کو اس امن اور شانتی والے مذہب اسلام میں داخل کیا جو ایک تاریخی
کام ہے۔ ہماری اﷲ سے دعاء ہے کہ اﷲ ان نیک سیرت بزرگوں کی قبروں کو اپنے
نور سے بھر دے۔ ان کے درجات کو بلند کرے اور لوگ رہتی دنیا تک ان نیک سیرت
بزرگوں کے کارناموں کو یاد رکھیں۔ ان نیک سیرت بزرگوں نے تو انتھک محنت کر
کے غیر مسلموں کو کلمہ پڑھا کرمسلمان کر دیا۔ ان کو محبت اور پیار کا درس
دیا جس وجہ سے 1400 سال گزر گئے مگر لوگ اب بھی ان کی محبت میں گرفتار ہیں
اور ہر سال تین دن کے لیے حاضر ہو کر ان سے عقیدت اور محبت کا اظہار کرتے
ہیں۔ اب اس وقت کے مسلمانوں کا کام ہے ان سیدھے سادے مسلمان لوگوں کو مذید
دین اسلام کی تبلیغ کر کے بہتر مسلمان بنائیں تا کہ یہ سیدھے سادے مسلمان
اﷲ کے دین کو عملاً قائم کرنے کے انبیاء کے نیک مشن میں شامل ہو جائیں۔
دکھی دنیا کو راحت نصیب ہو۔ اﷲ کی زمین پر اﷲ کے کلمے کا بھول بھالا ہو۔ اﷲ
مسلمانوں سے راضی ہو۔ اﷲ کی طرف سے آسمان سے رزق نازل ہو۔ زمین اپنے اندر
کے خزانے باہر اگل دے۔ امن وامان ہو انسان اور انسانیت کی قدر ہو عدل قائم
ہو حق دار کو حق ملے۔ مظلوم کی داد رسی ہو خوش حالی ہواور اﷲ تعالیٰ سے
دعاء کریں کہ اﷲ آخرت میں ان کو جنت میں داخل کر ے۔ آمین ۔
سندھ کے مشہور تاریخ دانوں نے عبدﷲ شاہ غازی کے سندھ میں تشریف لانے کے
متعلق دو باتیں تاریخ میں نقل کی ہیں۔ ایک بات جناب سہیل ظہیر لاری صاحب نے
بیان کی کہ عبداﷲ شاہ غازی نفس ذکیہ کے فرزند ہیں یہ مدینے میں سن720 ء
میں پیدا ہوئے اور یہ سندھ میں سن760 ء میں تشریف لائے۔ اُس وقت وہ
گھوڑوں کا کاروبار کرتے تھے اور سندھ آتے وقت انہوں نے کوفہ دمشق سے عربی
نسل کے کثیرے تعداد میں کھوڑے خریدے اور ان کے تجارت کے لیے سندھ تشریف
لائے۔ مسلمان داعی الا ﷲ ہوتا ہے تجارت کے ساتھ اﷲ کے دین کو پھیلانا اور
اﷲ کی مخلوق کو اﷲ تعالیٰ کی واحدنیت کی تعلیم دینا ان بزرک ہستیوں کے مشن
میں ہمیشہ سے شامل رہا ہے۔ اس لیے عبداﷲ شاہ غازی نے سندھ میں لوگوں کودین
اسلام کی تبلیغ کرنا بھی شروع کی اور لا تعداد لوگوں کو اسلام کے امن
وشانتی والے مذہب میں شامل کیا۔سادات فیملی سے تعلق کی وجہ سے لوگ ان سے
بہت ہی محبت اور عقیدت رکھتے تھے اور ان کی باتوں پر توجہ دیتے تھے ۔
دوسری بات مشہور تاریخ دان جناب ڈاکٹر عمر بن داؤد پوتا کے حوالے سے مشہور
ہے کہ عبداﷲ شاہ غازی کا اصل نام عبداﷲ بن نبحان ہے اوریہ اسلام فوج کے
جرنل تھے اور وہ حجاج بن یوسف والی بصرہ کے حکم سے راجہ داہر والی سندھ سے
باز پرس کے لیے اپنے کمانڈر بادل بن طوحافہ کے ساتھ سندھ تشریف لائے تھے ۔مشہور
واقعہ ہے کہ لنکا سے مسلمان تاجر خواتین کے ساتھ بحری جہاز میں عرب کی طرف
جا رہے تھے کہ دیبل کی بندرگاہ کے قریب بحری ڈاکووں نے انہیں لوٹ لیا اور
مسافروں کو قید کر دیا اس پر ایک مسلمان عورت نے بصرہ کے حاکم حجاج بن یوسف
کو اپنی رہائی کے لیے خط لکھا تھا۔ حجاج بن یوسف نے سندھ کے حکم راجہ داہر
کر ایک خط لکھا کہ عرب مسافروں کو رہا کرو اور ان کو بحفاظت روانہ کر دو
مگر راجہ دہر نے واپس خط لکھا کہ بحری ڈاکو میرے کنٹرول میں نہیں ہیں میں
مسافروں کو بحفاظت روانہ نہیں کر سکتا۔ حجاج بن یوسف نے اسی سلسلے میں عبداﷲ
شاہ غازی کو سندھ بھیجا تھا۔بعد میں حجاج بن یوسف نے محمد بن قاسم کو راجہ
داہر کے خلاف جنگ اور مسلمان قیدیوں کی رہائی کے لیے روانہ کیا تھا اور
محمد بن قاسم نے راجہ داہر کو سندھ میں شکست دی اور مسلمان قیدیوں کو رہا
کروایا اور سند ھ کو باب الاسلام ہونے کا شرف حاصل ہوا۔ اس کے بعد عبداﷲ
شاہ غازی سندھ میں مستقل آباد ہو گئے اوردین اسلام کی تبلیغ کرنی شروع کر
دی ۔عبداﷲ شاہ غازی کو شکار کا بھی بڑا شوق تھا وہ شکار کے لیے اپنے مرکز
سے دور دراز علاقوں میں تشریف لے جاتے تھے۔ ایک دفعہ ان کی دشمنوں سے مٹھ
بیڑ ہو گئی۔ دشمن زیادہ تعداد میں تھے عبداﷲ شاہ غازی نے صلح کی بجائے ان
سے جنگ کی اور ان کو شکست دی۔ اس بہادری کی وجہ سے سندھ کے عوام نے انہیں
غازی کا خطاب دیا یعنی جنگ جیتنے والا۔
عبداﷲ شاہ غازی کی وفات773 ء میں کراچی کے قریب ہوئی اور ان کو موجودہ جگہ
کلفٹن میں موجودہ پہاڑی پر دفن کیا۔ یاد رہے کہ اس پہاڑی کے نیچے میٹھے
پانی کا چشمہ موجود ہے ۔ راقم نے خود اس چشمہ کا مشاہدہ ۱۹۶۴ء میں کیا تھا۔
شاہد لوگوں کے زیادہ رش کی وجہ سے اب مزار کی انتظامیہ نے چشمہ کو سامنے سے
بند کر دیا گیا ہے۔
عبداﷲ شاہ غازی کا سندھ میں آنے کا سبب کچھ بھی ہو مگر ایک بات روز روشن کی
طرح عیاں ہے کہ مسلمان چائے جنرل ہو ، کمانڈر ہویا تاجر ہو،بادشاہ ہو، کسی
علاقعے کاحاکم ہو، استاد ہو کچھ بھی ہو داعی الااﷲ ہوتا ہے۔ اس کا کام اﷲ
کے دین کو اﷲ کی زمین پرقائم کرنا ہو تا ہے۔ اسی لیے اﷲ تعالیٰ نے قرآن
شریف میں فرمایا کہ میں نے انسان کو زمین میں اپنا خلیفہ مقرر کیا ہے اور
خلیفہ کے ذمے یہ کام لگایا ہے کہ اﷲ کی کبریائی بیان کرے۔ اﷲ کے بندوں کو
اﷲ کا بندہ بنائے۔ ان کو واحدت کی لڑی میں پروئے۔ اس ذمہ داری کو عبد اﷲ
شاہ غازی نے خوش اسلوبی سے پورا کیا ۔ لا تعداد لوگوں کو اسلام کی دعوت دی۔
لوگ اسلام لائے ۔اﷲ نے ان کاذکر اس دنیا میں بھی بلند کیا آخرت میں اپنے
نیک بندوں سے جنت کا وعدہ تو ہے ہی ۔
|