سیرت نبوی ﷺ اور ہمارے بچے

(Babar Alyas, Chichawatni)

میں بھی ایک استاد ھوں اسکول کی وجہ سے والدین سے رابطہ رہتا ھے اس لیے اس عنوان پر لکھنے کو قلم اٹھایا ھے اور میرا تمام والدین کو مشورہ ھے کہ اپنے بچوں کو اپنے قریب کیجیے
چند روز پہلے عربی کے چند کلمات ایک جگہ پڑھے تو ان کی جامعیت نے مجھے تو حیران کر دیا۔ چار کلمات پر مشتمل یہ نہایت قیمتی نصیحتیں گویا والدین کے لیے اپنے بچوں کے ساتھ خوشگوار تعلقات کی اعلی کلید ہیں…
اقتربوا من ابناکم… وشاوروھم… وحاوروھم…واکسبوھم… قبل ان تخسروھم…!
ترجمہ:
اپنے بچوں کے قریب رہا کرو …
انُ سے مشورے کیا کرو…
تبادلۂ خیال کیا کرو…انُ کے دل جیت لو…
قبل اس کے کہ تم انہیں ہمیشہ کے لئےکھو دو…
میں کہتا ھوں کہ والدین کی سب سے اول اور بڑی ذمے داری، بچوں کی صحیح تعلیم وتربیت ہوتی ہے۔ بچپن اور لڑکپن کا زمانہ بے شعوری وبے خیالی کا دور ہوتا ہے۔اس وقت بچے بڑوں کے رحم وکرم کے محتاج ہوتے ہیں۔ بچے انہی کو اپنا محسن سمجھتے ہیں جو انہیں اپنے قریب رکھتے ہیں، ان سے پیار کرتے ہیں۔بہترین تربیت جو قربت وانسیت سے ممکن ہے، ڈانٹ ڈپٹ اور مار دھاڑ سے ہرگز ویسی ممکن ہی نہیں.
سیرت النبی صلی اللہ علیہ والہ وسلم میں بچوں کے ساتھ آپ صلی اللہ علیہ وسلم کے حسنِ سلوک کا جائزہ لیں تو آپ بہترین مربّی اور بچوں پر رحم کرنے والے نظر آئیں گے۔
آپ ﷺ نے بچوں کے ساتھ نرمی، محبت، عاطفت،الفت کا درس نہ صرف اپنی تعلیمات ہی کے ذریعہ دیا، بلکہ اپنے عمل سے بھی اس کا ثبوت پیش فرمایا۔*
آپﷺ نے بچوں کے بچپنے کا ہر لحاظ سے خیال رکھا۔ اپنی تمام تر رفعت شان کے باوجود ان کے ساتھ کھیلے بھی اور کبھی ان پر سختی نہیں فرمائی۔
اپنے پیارے نواسوں سے آپﷺ کی محبت و شفقت کے کئی واقعات ہم سنتے پڑھتے رہتے ہیں کہ کیسے وہ عین نماز کی حالت میں بھی لاڈ سے آپ ﷺ پر سوار ہوجاتے تھے اور آپﷺ ناراض تو کیا ہوتے، ان کے لیے سجدے کو طویل فرما لیتے۔
ایک بار آپﷺ حضرت حسن کو چوم رہے تھے۔ ایک دیہاتی نے اعتراض کرتے ہوئے گویا حیرت کا اظہار کیا آپﷺ نے فرمایا:
اگر اللّہ نے تیرے دل سے رحمت کو نکال دیا تو میں کیا کرسکتا ہوں؟
ایک بار ایک اور ایسے ہی موقع پر جب ایک صحابی نے حیرت کا اظہار کیا تو فرمایا کہ جو شخص رحم نہیں کرتا، اس پر بھی رحم نہیں کیا جاتا۔
مسلمان تو مسلمان ،حضور نے تو کفار کے بچوں کے ساتھ بھی نرمی کی تلقین فرمائی۔ ایک یہودی کا لڑکا آپ علیہ السلام کی خدمت میں آیا کرتا تھا۔ وہ ایک دفعہ بیمار ہوگیا۔ آپﷺ نے از خود تشریف لے جا کر اس کی عیادت فرمائی۔ اس بچے کے سر ہانے بیٹھے، پھر اس بچے سے فرمایا: اسلام قبول کرو، اس بچے نے اپنے والد پر نظر ڈالی۔ والد نے بھی کہا:ابوالقاسم (ﷺ)کی اطاعت کرو، لہٰذا وہ بچہ مسلمان ہوگیا۔ آپﷺ یہ کہتے ہوئے نکلے:
"تمام تعریفیں اسی اللّہ کے لئے ہیں جس نے اس کو آگ سے بچالیا۔"
آج ضرورت ہے کہ اس اسوہ حسنہ صلی اللہ علیہ والہ وسلم کی روشنی میں ہم اپنے سلوک کا جائزہ لیں تو معلوم ہو گا کہ کفار اور غیر کے بچے تو الگ، ہم اپنے بچوں، اپنے خون کے ساتھ کیسا بیگانے کا سا سلوک کرتے ہیں؟
باپ کی درشت مزاجی کی وجہ سے بچہ پڑوسی انکل کے زیادہ قریب، باپ سے دور ہوتا ہے…
بات بات پہ مارنا، چلانا، برا بھلا کہنا بچوں کو نہ صرف ڈھیٹ بنا دیتا ہے بلکہ ان کو ماں باپ سے دور بھی کر دیتا ہے…
پھرہوتا یہ ہے کہ بچے اس جذباتی خلا کو باہر والوں سے پر کرنے کی کوشش کرتے ہیں…
باہر پھرتے سفاک درندے ایسے ہی معصوموں کا شکار کرنے گھات لگائے بیٹھے ہوتے ہیں… سو وہ انہیں جھوٹی محبت کے جال میں پھانس کر ان کا جذباتی و جنسی استحصال تک کر بیٹھتے ہیں۔
گھر میں خود بچے سے متعلق امور میں بھی اس سے کوئی مشورہ نہیں ہوتا، نہ اس سے رائے لی جاتی ہے اور نہ اس کی پسند ناپسند کا خیال رکھا جاتا ہے…
ہر وقت، ہر بات میں بس اپنی مرضی چلائی بلکہ باقاعدہ ٹھونسی جاتی ہے…
آہستہ آہستہ والدین اور بچوں کے درمیان ایک ایسی اجنبیت کی دیوار کھڑی ہونے لگتی ہے کہ پھر بچہ کسی جذباتی کشمکش کا شکار ہو جائے، اس کے ساتھ کچھ غلط ہونے لگے تو وہ چاہتے ہوئے بھی اپنی بات والدین سے شیئر نہیں کر پاتا…
اور یوں یہ صورت حال کبھی خدانخواستہ ناقابل تلافی نقصان کا باعث بن جاتی ہے۔
یاد رکھیے …
انگلی پکڑ کر چلانے والے ہاتھ جب ہاتھ چھوڑ دیں تو پھر جانے کون کون انگلیاں پکڑتا ہے اور کس کس سمت لے جاتا..میری گزارش ہے تمام دوستوں سے, اہل علم ؤ ہنر, دانش, فکر رکھنے والوں سے, اور خاص طور پر محترم والدین سے کہ اپنے احساسات کو جھنجھوڑئیے اپنی غفلت کو دور کیجیے۔
اپنی آنے والی نسلوں کے بہتر اور روشن مستقبل کے لیے ان ہونہار نونہالوں کو اپنے سے قریب تر کیجیے، ان سے مشورے کیجیے، انہیں اہمیت کا احساس دلائیے، گاہے ان کے ساتھ تبادلۂ خیال کیا کیجیے اور ان کے دل جیت لیجیے…
قبل اس کے کہ آپ انہیں ہمیشہ کے لئے کھو دیں…!
اللّہ سبحان و تعالی ہم سب کو عقل سلیم عطا فرمائے اور اچھے والدین بننے کی توفیق عطا فرمائے......اور اللہ پاک سے دعا ھے نبی کریم صلی اللہ علیہ والہ وسلم کی تعلیمات پر عمل کرنے کی توفیق عطا فرماۓ تاکہ اپنے بچوں کی پرورش اسلام کی روشنی میں کر کے ایک اعلی قوم بنا سکیں......


 

Comments Print Article Print
 PREVIOUS
NEXT 
About the Author: Babar Alyas

Read More Articles by Babar Alyas : 254 Articles with 90816 views »
استاد ہونے کے ناطے میرا مشن ہے کہ دائرہ اسلام کی حدود میں رہتے ہوۓ لکھو اور مقصد اپنی اصلاح ہو,
ایم اے مطالعہ پاکستان کرنے بعد کے درس نظامی کا کورس
.. View More
21 Nov, 2018 Views: 261

Comments

آپ کی رائے

مزہبی کالم نگاری میں لکھنے اور تبصرہ کرنے والے احباب سے گزارش ہے کہ دوسرے مسالک کا احترام کرتے ہوئے تنقیدی الفاظ اور تبصروں سے گریز فرمائیں - شکریہ