|
آج سے کوئی سات سال پہلے کی بات ہے کہ میں ایک نئے مکان
میں شفٹ ہوئی۔ شفٹ ہونے کے بعد میں نےاس گھر میں اپنا گیزر لگانا تھا۔ یہ
سردیوں کے دن تھے اور گرم پانی کے بغیر گذارہ ممکن نہیں تھا۔ میں نے ایک
پلمبر کو بلایا ۔ اس نے کام دیکھا اور پھر مجھے کہا کہ آپ کا یہ کام پندرہ
سو روپے میں ہوگا۔ میں نے اس سے درخواست کی کہ آپ ایک ہزار میں کام کردیں۔
لیکن اس نے کہا کہ اس کا باٹا ریٹ ہے۔ وہ لوگوں کے ساتھ بارگین نہیں کرتا۔
خیر میری مجبوری تھی ۔ میں چپ رہی۔ میں نے اسے کہا کہ آپ گیزر لگا دیں۔
مجھے اس کا رویہ اچھا نہیں لگا ۔ کیونکہ مجھے یو ں محسوس ہوا جیسے وہ جان
بوجھ کر ڈیل خراب کرنا چاہتا ہے۔ اسے میری مجبوری کا علم تھا اس لئے وہ
اپنی بات پر قائم رہا۔
اس نے آدھے گھنٹے کے اندر گیزر لگا دیا۔ اس کے بعد پندرہ سو لئے اور چل دیا۔
گیزر بھی اس نے جس طرح لگایا وہ مجھے معلوم ہے، ایک ایک چیز میں اس کو پکڑا
رہی تھی۔ سارے معاملے میں اس کی مدد کرتا رہی۔ اسے چائے بھی پلائی۔ خیر اس
نے اپنے پیسے لئے اور چلا گیا۔ میں بھی بات بھول بھال گئی۔
کچھ عرصہ بعد میں دو چار گلی چھوڑ کر ایک کشادہ مکان میں شفٹ ہوگئی۔ لیکن
یہاں بھی گیزر لگانے کا مسئلہ درپیش تھا۔ پہلے میرے دل میں خیال آیا کہ اسی
پلمبر کو بلاؤں جس نے پہلے فٹ کیا تھا۔ لیکن اس کا رویہ یاد آیا تو میں نے
اپنا ارادہ ملتوی کردیا اور کسی اور بندے کو ڈھونڈنے نکل پڑی۔ خیر تھوڑی سی
کوشش کے بعد مجھے ایک پلمبر مل گیا۔ وہ میرے ساتھ آیا ۔ کام کا جائزہ لیا
اور کہا میں آپ سے اس کام کے ایک ہزار لوں گا۔
میں نے کہا کہ کوئی مہربانی کریں۔ جس پر اس نے مسکرا کر کہا کہ شاکرہ میڈم
کوئی بات نہیں آپ مجھے 8 سو روپے دے دینا۔ میں نے کہا کہ ٹھیک ہے آپ کام
شروع کریں۔ وہ آیا اور اپنے ساتھ ایک اور لڑکا بھی لایا۔ ان دونوں نے آدھے
گھنٹے میں گیزر لگایا۔ چائے پینے کے بعد میں نے آٹھ سو اس بندے کو دئیے۔ اس
نے پیسے لئے۔ شکر الحمداللہ کہا۔ تین سو ساتھ لائے لڑکے کو بھی دئیے، پانچ
سو اپنی جیب میں ڈالے، میرا شکریہ ادا کیا اور جاتے جاتے فیڈ بیک بھی لیا
کہ شاکرہ میڈم آپ کام سے تو مطمئین ہیں ۔ جس پر میں نے اس کے کام کی تعریف
کی اور اس کا نمبر بھی لے لیا۔
دو چار دن بعد ایک دوست کی کال آئی کہ یار آپ نے گیزر جس بندے سے لگوایا ہے
اس کا نمبر تو دے دیں۔ کیونکہ میں نے نیا گیزر لیا ہے۔ میں نے فوراً سے اس
بندے کا نمبر ڈائل کیا اور اسے اپنے دوست کے گھر پہنچنے کا کہا۔ اس نے آٹھ
سو میں اس کا بھی کام کردیا۔ اس کے بعد اس پلمبر کو میں نے اپنے ریفرنس سے
کوئی دس جگہ نلوں، پائپوں اور گیزر کے کام کے لئے بھیجا۔ ہرجگہ اس نے اپنا
تعلق بنایا، لوگوں کے دلوں میں جگہ بنائی اور نئے ریفرنس بھی ڈھونڈے۔
آج اس بندے کی مارکیٹ میں سینٹری کی سب سے بڑی دکان ہے۔ اس کے پاس دس کے
قریب اسٹاف ہے جس میں پلمبر، الیکٹریشن اور پینٹرز موجود ہیں۔ آج بھی اس کا
رویہ یہی ہے۔ خوش اخلاقی ، فیڈ بیک، جس کے ساتھ ایک بار کام کرتا ہے وہ
بندہ اسے یاد رکھتا ہے۔ اس کے پاس آتا ہے، اس سے مشورہ لیتا ہے۔
اس کی کامیابی کے پیچھے ایک ہی راز ہے کہ یہ جو کنواں کھودتا ہے اسے دوبارہ
اپنے غلط اور لالچی رویے سے بند نہیں کرتا۔ یہ ہر نئے کنویں سے تھوڑا سا
پانی لیتا ہے اور آئندہ کے لئے دوبارہ پانی لینے کا راستہ کھلا چھوڑتا ہے۔
یہ ایک ہی بار میں پیسہ نہیں کمانا چاہتا ۔ یہ اپنے کسٹمرز کے دل میں اپنی
جگہ بنا تا ہے، ان کے تعلقات کی وجہ سے مزید آگے جاتا ہے اور مزید اچھا کام
کرکے اپنا سرکل بڑا کرتا جارہا ہے۔
مجھے وہ پہلا بندہ بھی یاد ہے۔ میں نےاسے کچھ عرصہ پہلے دیکھا ہے۔ وہ آج
بھی انہی حالوں میں ہے۔ اس کی آج بھی کوشش ہوتی ہے کہ جو بھی کنواں وہ
کھودے اسے فوراً بند بھی کردے۔ لیکن اس کے اس رویے کی وجہ سے اس کا اپنا
بخت بند ہوچکا ہے۔ یہ ایک بندے سے ایک ہی بار میں جو لے سکتا ہے لے لیتا ہے
اور پھر نئے بندے کی تلاش میں نکل جاتا ہے ۔ زندگی اس کی بھی چل رہی ہے
لیکن اس میں ترقی نہیں، عزت نے ، ریفرنس نہیں، فیڈ بیک نہیں، مہربانی نہیں
اور آگے بڑھنے کا جذبہ نہیں۔ مجھے اندازہ ہے کہ یہ بندہ جب اکیلا ہوگا تو
یہی سوچتا ہوگا کہ میری قسمت ہی خراب ہے یا یہ لوگ ہی خراب ہیں۔
اس لئے اگر زندگی میں آگے بڑھنا ہے تو محنت سے کھودے کنویں کو فوراً اپنے
لالچ اور غلط رویے کی وجہ سے بند نہ کریں۔ لوگوں کے ساتھ اچھا سلوک کریں۔
اپنے کسمٹرز کو اچھا کام دیں۔ ان کا اعتماد جیتیں۔ ان سے عزت لیں۔ ان کو
عزت دیں۔ اگر پیسے کم بھی بچ رہے ہیں تو کوئی بات نہیں۔ لیکن تعلق بچنا
چاہیے، آگے کے رابطے کی وجہ رہنی چاہیے۔ اس زمین پر لوگ بستے ہیں اور لوگ
ہی لوگوں کے کے کام آتے ہیں۔۔۔
|