ہمارے پیارے پیغمبر حضرت محمد صلی اﷲ علیہ وسلم عظیم تر ہیں

’’اے محمد ؐ!کہو کہ اے انسانو !میں تم سب کی طرف اُس خدا کا پیغمبرؐ ہوں جو زمین اور آسمانوں کی بادشاہی کا مالک ہے ‘‘(الا عراف۱۵۸) ’’درحقیقت تم لوگوں کے لیے اﷲ کے رسول ؐ میں ایک بہترین نمونہ ہے ،ہر اس شخص کے لیے جو اﷲ اور یوم آخر کا امیدوارہو اور کثرت سے اﷲ کو یاد کرے‘‘(الاحزاب۲۱) مسلم کی حدیث ہے کہ ایک دفعہ چند صحابہ ؓ نے حضرت عائشہ ؓام المومنین سے عرض کیا کہ آپ نبی اکرم ؐ کے کچھ حالات زندگی ہم کو بتائیں عائشہ صدیقہ ؓ نے تعجب سے دریافت کیا آپ نے قرآن نہیں پڑھا جو مجھ سے خلق نبی ؐ کے متعلق سوال کرتے ہو؟(مسلم )یعنی آپ ؐ کی ساری زندگی قرآن تھی۔۹ربیع لاول مطابق۲۰؍اپریل۵۷۱ ء( الر حیق المختوم) کی صبح مکہ کے ایک معزز قبیلہ قریش(بنی ہاشم) میں عبداﷲ بن عبدالمطلب کے گھر حضرت محمد صلی اﷲ علیہ وسلم پیدا ہوئے۔

دارالرقم میں دعوت کے پہلے ۳ سال:۔ نبوت کے پہلے ۳ سال خفیہ طریقے سے خاص خاص لوگو ں کو اﷲ کی دعوت پہنچاتے رہے۔ مرکز حضرت ارقم ؓ کے گھر کو بنایا۔ شروع دنوں میں حضرت خدیجہ ؓ ،حضرت علی ؓ،حضرت ابوبکر ؓ حضرت زید ؓ یہ سب پہلے ہی دن مسلمان ہوگئے تھے ۔

دعوت عام :۔پھر اس زمانے کے رواج کے مطابق پہاڑ صفا کی چوٹی پر چڑھ کر اعلان کیا، یاصباحا․یاصباحا، یعنی صبح کا خطرہ صبح کا خطرہ۔ قریش کے لوگوں کو پکارا لوگ جمع ہو گئے۔ٗ آپ ؐنے فرمایا اگر میں آپ لوگوں سے کہوں کہ پہاڑ کی دوسری طرف سے دشمن حملہ کرنے والا ہے تو آپ لوگ میری بات پر یقین کریں گے۔ سب نے کہا یک زبان ہو کر کہا آپ ؐ سچے ، صادق، امین اوراور نیک آدمی ہیں ہم ضرور یقین کریں گے۔ آپ ؐ نے فرمایا لوگومیں اﷲ کا پیغمبرؐ ہوں اور تمہیں ا ﷲ واحد کی طرف بلاتا ہوں۔ بتوں کی پوجا سے بچاتا ہوں۔ یہ زندگی چند روزہ ہے ۔سب نے اﷲ کے سامنے حاضر ہونا ہے اور اپنے اعمال کا حساب دینا ہے ۔جو لوگ چند منٹ پہلے آپ ؐ کوصاد اور امین کہہ رہے تھے آپؐ کی بات نہیں مانی اور برا بھلا کہہ کر واپس چلے گئے۔

ابو طالب کو دھمکی :۔قریش نے دھمکی کے لیے اپنے چند آدمی ابو طالب کے پاس بھیجے انہوں نے کہا تمہارے بھتیجے نے ہمارے خداؤں کو برا بھلا کہا ہے۔ لہذا آپ یا تو اس کو روک دیں یا درمیان سے ہٹ جائیں ہم اس کے لیے کافی ہیں۔ ابو طالب نے اس کا ذکر رسول ؐ اﷲ سے کیا ۔مگر رسول ؐنے فرمایایہ لوگ میرے ایک ہاتھ پر سورج اور دوسرے ہاتھ پر چاند رکھ دیں تب بھی میں یہ کام نہیں چھوڑوں گا ۔

عتبہ کی سفارت :۔ حضرت حمزہ ؓاور حضرت عمر ؓ کے اسلام لانے کے بعد قریش نے ایک نمایندہ عتبہ بن ربیعہ کو رسول ؐ کے پاس بھیجا ۔خانہ کعبہ کے اندر عتبہ نے رسول ؐ اﷲ سے ملاقات کی اور آپ ؐ کے سامنے قریش سے منظور شدہ گفتگو رکھی۔کہا ہماری قوم کے اندر آپ ؐ کا مرتبہ اور مقام ہے۔ اب آپؐ ایک بڑا معاملہ لے کر آئے ہو۔ جس سے قوم میں تفرقہ پڑھ گیا ہے۔ آپ ؐ نے کہا میری سنو آپ ؐ نے سورۃ حم السجدہ تلاوت فرمائی۔ عتبہ سنتا گیا اٹھا اور سیدھا ساتھیوں کے پاس گیا ۔ ان سے کہا جو کچھ وہلایا ہے اگر لوگوں نے مان لیا تو تمھاری ہی فتح ہو گی ۔

بنو عاشم اور بنو مطلب کی میٹنگ :۔ ابو طالب کو مقابلے کی دھمکی ، ابوجہل کا رسول ؐ اﷲ کے سر پر بھاری پتھر رکھنے،عتبہ بن ابی معیط کا چادر لپیٹ کر گلا گھونٹنے، یہ سب باتیں سنگین خطرہ محسوس ہو رہی تھیں۔ اس لیے ابو طالب نے جدِاعلیٰ عبدِمناف کے دونوں صاحبزادوں ہاشم اور مطلب سے وجود میں آنے والے خاندان کو جمع کیا اور کہا اب رسول ؐ اﷲ کی سب حفاظت کریں۔ ابو طالب کی یہ بات عربی حمیت کے پیش نظر ان دونوں خاندانوں کے سارے مسلم اور کافر افراد نے قبول کی۔ البتہ صرف ابو لہب جو رسولؐ اﷲ کا سکاچچا تھا مشرکین سے جا ملا۔

ولید کی سفارت:۔ ایک دفعہ خانہ کعبہ میں سرداران قریش موجود تھے۔ رسول ؐاﷲ بھی ایک کونے میں تشریف فرما تھے۔ ان ہی دنوں حج کا موسم تھا۔ قریش کو فکر ہوئی کہ رسول ؐاﷲ آنے والے حاجیوں میں اپنے دین کو پھیلائے گا۔ لہذا کو ئی تدبیر کرنی چاہیے ۔ کافی سوچ بچار کے بعد ولید نے مشورہ دیا ہم کہیں گے جادوگر ہے۔ اس بات کے بعد سب پھیل گئے اور آنے والے حاجیوں میں وہ پروپیگنڈا شروع کر دیا۔ اس سے لوگوں میں مشہور ہوگیا کہ آپ ؐاﷲ نے دعویٰ نبوت کیا ہے۔ ان کی اس حرکت سے دیار عرب میں آپ ؐ کا چرچا پہلے سے زیادہ ہوگیا۔

تکالیف:۔مکہ کے ۱۳؍ سال میں آپ ؐاور صحابہ ؓ کو بہت ستایا گیا۔ رسول ؐاﷲ نے کہا دین کے معاملے میں جتنا مجھے ستایا گیا ہے کوئی اور پیغمبر ؑ نہیں ستایا گیا۔ بازار کے اندر آپ ؐ لوگوں کودعوت دیتے پیچھے ابو لہب لوگوں کو کہتا یہ میرا بھتیجا ہے یہ جھوٹ کہتا ہے، خانہ کعبہ میں سجدے کی حالت میں سر پر اونٹ کی اوجھ ڈالی گئی، گردن میں چادر ڈال کرختم کر دینے کی کوشش کی گئی، دو بیٹیوں رقیہ ؓاور ام کلثوم ؓ کوچچا ابولہب کے بیٹوں نے طلاق دی،طائف میں لہو لہان کیا گیا، رسول ؐ اﷲ کا بیٹا عبداﷲ فوت ہوا تو ابولہب خوش ہوا دوستوں کو خوشخبری دی کہ محمد ؐ ابتر ہو گیا ہے،ابو لہب کی بیوی جو ابو سفیان کی بہن تھی رسول ؐاﷲ کے راستے میں کانٹے ڈالتی تھی،آپ ؐ کے کافر پڑوسی جب آپ ؐ گھر میں نماز پڑھ رہے ہوتے تو وہ آپ کے سرپر بکری کی بچہ دانی ڈال دیتے ،چولھے پر ہانڈی چڑھائی جاتی تو بچہ دانی اس طرح پھینکتے کہ سیدھے ہانڈی میں جا گرتی،امیہ بن خلف کا وطیرہ تھا جب رسول ؐ کو دیکھتا تو لعن طعن کرتا ، ۳ سال تک شعب ابوطا لب میں محصور رکھا گیا،قتل کرنے کی اور ملک بدر کرنے کی سازش کی گئی ۔صحابہ ؓ کو اتنا پریشان کیا گیا کہ وہ دو دفع حبشہ ہجرت کرنے پر مجبور ہوئے۔

قریش کی آخری سفارت:۔جب ابو طلب بیمار ہوئے تو قریش کو فکر ہوئی کہ ان کی زندگی میں ہی کچھ معاملہ ہو جانا چا ہیے۔ چنا نچے قریش ایک بڑا وفد جس میں عتبہ بن ر بیعہ ،شیبہ بن ر بیعہ ،ابو جہل بن ہشام، امیہ بن خلف، ابو سفیان بن حرب اور دیگر تقریباً ۲۵؍ افراد آئے ۔ رسول ؐ اﷲ نے ان کی باتیں سن کر کہا آپ لوگوں کو میں ایک ایسا کلمہ نہ بتاؤں جس کو اگر آپ مان لیں تو آپ عرب کے بادشاہ بن جائیں اور عجم آپ کے زیر نگیں آ جائیں۔ تو آپ کی کیارائے ہو گی۔ قریش یہ سن کر حیران تھے آخر ابو جہل نے کہا اچھا بتاو ہم ایسی دس باتیں ماننے کے لیےٗ تیار ہیں۔ آپ ؐ نے فرمایا’’آپ لوگ’’ لا الٰہ الا اﷲ‘‘ کہیں اور اﷲ کے سوا جو کچھ پوجتے ہیں اسے چھوڑ دیں۔ اس پر انہوں نے ہاتھ پیٹ پیٹ کر کہا ’’محمد ؐ !تم یہ چاہتے ہو کہ سارے خداؤں کی جگہ بس ایک ہی خدا بنا ڈالیں؟

طا ئف کا سفر :۔ ۱۰ ؁ نبوت میں رسول ؐاﷲ طائف دعوت کی غرض سے تشریف لے گئے۔ مگر انہوں نے شریر لڑکے آپ کے پیچھے لگا دیے۔ آپ پر پتھروں کی بارش کی گئی آپ لہو لہان ہو گئے۔ پہاڑوں کے فرشتے نے آکر کہا مجھے اﷲ نے بھیجا ہے آپ ؐ کہیں تو ان کو دو پہاڑوں کے درمیان ان کو پیس دوں، مگر پھر بھی آپ ؐ نے ان کے ایمان لانے کی دعاء کی۔

معراج :۔اس کے بعد اﷲ نے اپنے رسول ؐ کو معراج کرائی ، دوسری باتوں کے علاوہ پانچ وقتہ نماز فرض کی گئی۔دوسرے پیغمبروں ؑسے ملاقات کرائی،جنت دوزخ کا مشاہدہ کرایا،پھر اسی رات بیت المقدس سے مکہ تشریف لے آئے ۔ لوگوں نے حضرت ابوکرؓ کو طنزاً کہا کہ تمھارا دوست ایسے کہتا ہے۔ حضڑت ابوبکرؓ کہا صحیح کہتا ہے وہ اﷲ کا پیغمبرؐ ہے۔

بیعت عقبہ:۔ رسول ؐ طائف سے واپس آئے اس کے بعد بیعت عقبہ ہوئی انصارِ مدینہ نے رسول ؐاﷲ کو مدینے آنے کی دعوت دی گئی۔ ان حضرات نے آپ ؐکو ایک معاہدے کے تحت رسولؐ اﷲ کو اﷲ کا پیغمبرؐ مان کے مدینے میں بلایا۔

ہجرت:۔ دو شنبہ ۸ ربیع الاول ۱۴؁نبوت یعنی ۱ ؁ ہجری مطابق ۲۳ ستمبر ۶۲۲ ؁ ء کو رسولؐاﷲ قباء میں دارد ہوئے۔ مسلمانانِ مدینہ رسولؐ ؐاﷲ کے انتظار میں تھے ۔آپ ؐ کے دیدار کے لیے سارا مدینہ امنڈ آیا۔یہ ایک تاریخی دن تھا جس کی نظیر سر زمین ِمدینہ نے کبھی نہ دیکھی تھی ۔ اسی دوران مسجد قباء کی بنیاد رکھی اور نماز ادا کی اس کے بعد رسول ؐاﷲ مدینہ کی طرف روانہ ہوئے۔

مدینے میں مشکلات :۔رسول ؐ کو مدینے میں بھی آرام سے اﷲ کے دین کوپھیلانے کے لیے نہ چھوڑا گیا۔ طرح طرح سے رکاوٹیں ڈالی گئیں۔ بدر، احد اور خندق کی جنگ ہوئیں۔جنگ خندق کے موقعے پرتمام عرب کے مشرکوں نے مدینے کا محاصرہ کیا مگر اُنہیں شکست ہوئی۔

فتح مکہ:۔۔ رسول ؐ نے ۱۰ رمضان ۸ ؁ ھ ۱۰ ہزار صحابہ ؓ کے ساتھ مکہ کا رخ کیا اﷲ نے فتح عطا کی۔ فتح مکہ کے بعد آپؐ نے عام معافی کا اعلان کیا خانہ کعبہ میں داخل ہو کر سب بتوں کو توڑ ڈالا۔

خطبہ حجۃ الوداع:۔رسول ؐ نے پہلے اﷲ کی کبریائی بیان کی پھرفرمایا جاہلیت کے تمام دستور میرے پاؤں کے نیچے ہیں،عربی کو عجمی سفید کو سیاہ پر کوئی فضلیت نہیں مگر تقویٰ،مسلمان بھائی بھائی ہیں،جو خود کھاؤ، وہی غلاموں کو کھلاؤ،جاہلیت کے تمام خون معاف،سود پر پابندی،عورتوں کے حقوق،ایک دوسرے کا خون اور مال حرام،کتاب اﷲ کو مضبوطی سے پکڑنے کی تاکید،حقدار کو حق،لڑکا اس کا جس کے بستر پر پیدا ہوا، اس کے بعد ایک لاکھ چالیس ہزار انسانوں کے سمندر کو آپ ؐنے فرمایا میر ے بعد کوئی بنیؑ نہیں ہے۔ اﷲ کی عبادت کرنا پانچ وقت کی نماز رمضان کے روزے زکوۃ اﷲ کے گھر کا حج اور اپنے حکمرانوں کی اطاعت کرنا جنت میں داخل ہو گے ۔تم سے میرے متعلق پوچھا جانے والا ہے صحابہ ؓ نے کہا آپ نے تبلیغ کر دی، پیغام پہنچا دیا اور حق ادا کر دیا۔یہ سن کر شہادت کی انگلی کو آسمان کی طرف اٹھایا اور کہا اے اﷲ آپ بھی گواہ رہیے۔

دین یعنی دستور عمل مکمل ہو گیا:۔اس خطبے کے بعد یہ آیات نازل ہوئیں ’’آج میں نے تمہارے لیے تمہارا دین مکمل کر دیا اور تم پر اپنی نعمت پوری کر دی اور تمہارے لیے اسلام کو بحیثیت دین پسند کر لیا‘‘ (المائدہ۳)اب رہتی دنیا تک یہ ہی دین غالب رہے گا ۔حضرت محمد صلی اﷲ علیہ و سلم اﷲ کے آخری پیغمبرؐ ہیں اور یہ دین آخری دین ہے۔ قیامت تک نہ کوئی نیا نبیؑ آئے گا۔ نہ نیا دین آئے گا۔ اب اس دین کو دوسری قوموں تک پہنچانے کا کام امت محمدی ؐ کرے گی۔ لہذا ہمارے لیے سبق ہے کہ ہم اپنے اعمال ٹھیک کریں ۔اسلام کے دستور میں جتنی بھی انسانوں کی خواہشات داخل کر دی گئیں ہیں انہیں ایک ایک کر کے اپنے دستو ر عمل سے نکال دیں۔ اپنے ملک میں اسلامی نظام، نظام مصطفےٰ، حکومت الہیہ( جو بھی نام ہو) اس کو قائم کریں۔ پھر اس دستور کو دنیا کے تمام انسانوں تک پہنچائیں جنت کے حق دار بنیں اور جہنم کی آگ سے نجات پائیں جو کافروں کے لیے تیار کی گئی ہے۔ اپنی آخری منزل جنت میں داخل ہوں۔ جہاں ہمیشہ رہنا ہے۔ جہاں نہ موت ہو گی نہ تکلیف ہو گی۔ اﷲ مومنوں سے راضی ہو گا، یہی کامیابی ہے۔ ہی ربیع الاول کا پیغام ہے۔