وقت ذرا دھیرے سے چل۔۔۔

وقت ذرا دھیرے سے چل
وقت ذرا دھیرے سے چل۔۔۔ میرا بہت کچھ پیچھے رہ گیا ہے ۔۔۔ میرے پیاروں کی بےشمار یادیں ۔۔۔ کچھ آنسو۔۔۔ کچھ ہنسی۔۔۔ ڈھیر سی باتیں۔۔۔ انمول سے رشتے اور بے پناہ چاہتیں۔۔۔ خوبصورت سے دن اور حسین سی راتیں۔۔۔ تھوڑی سی تکلیفیں اور بیش بہا راحتیں۔۔۔

وقت ذرا دھیرے سے چل۔۔۔ میرا بہت کچھ پیچھے رہ گیا ہے۔۔۔ ایک چھوٹی سی بچی ۔۔۔ ساتھ ابو کے چلتے ہوٸے۔۔۔ قدم تیز تیز بھرتے ہوٸے۔۔۔ لفافہ جلیبی سموسوں کا پکڑے ہوۓ ۔۔۔جانب گھر کے چلے جا رہی ہے۔۔۔ بےلوث محبت کے موتی چنے جا رہی ہے۔۔۔

وقت ذرا دھیرے سے چل۔۔۔ میرا بہت کچھ پیچھے رہ گیا ہے۔۔۔کنارےسمندر کے، بہن اور بھاٸی بھاگتے ہوٸے ۔۔۔ اک دوسرے سے آگے نکلتے ہوۓ۔۔۔ ہنستے ہوٸے شور وغل مچاتے ہوۓ ۔۔۔ لہروں کے سنگ چلے جا رہے ہیں ۔۔۔ یادوں کی سیپیاں پکڑے جا رہے ہیں۔۔۔

وقت ذرا دھیرے سے چل ۔۔۔ میرا بہت کچھ پیچھے رہ گیا ہے۔۔۔ امی رمضان کی سہری بناتے ہوٸے ۔۔۔ بچے ابو کو گھیرا ڈالے ہوۓ ۔۔۔ ابو قصے کہانیاں سناتے ہوۓ ۔۔۔ ہر کہانی بار بار سنے جارہے ہیں ۔۔۔ خوبصورت سی ایک کتاب لکھے جا رہے ہیں ۔۔۔

وقت ذرا دھیرے سے چل ۔۔۔ میرا بہت کچھ پیچھے رہ گیا ہے ۔۔۔ سکول میں سہلیاں پڑھتے ہوۓ۔۔۔ آنکھوں سے اک دوجے کو اشارے کرتے ہوۓ ۔۔۔ استاد کی نگاہوں سے بچتے ہوے ۔۔۔ کوٸی نا کوٸی منصوبہ بناۓ جارہی ہیں ۔۔۔ شرارت بھری کہانی تخلیق کیے جا رہی ہیں۔۔۔

وقت ذرا دھیرے سے چل ۔۔۔ میرا بہت کچھ پیچھے رہ گیا ہے ۔۔۔ کتابوں کا پلندا اٹھاۓ ہوۓ ۔۔۔ مستقبل کے خواب آنکھوں میں سجاۓ ہوۓ ۔۔ اک اپنی ہی دنیا بساۓ ہوۓ ۔۔۔یونیورسٹی کی سیڑھی چڑھے جا رہی ہے ۔۔۔ ڈگری پہ ڈگری لیے جا رہی ہے ۔۔۔

وقت ذرا دھیرے سے چل۔۔۔ میرا بہت کچھ پیچھے رہ گیا ہے ۔۔۔ ہاتھوں پہ مہندی لگاتے ہوۓ ۔۔۔ ڈھولک کی محفل سجاتے ہوۓ ۔۔۔ امی ابو اپنے غم کو چھپاتے ہوۓ ۔۔۔ آج دلہن بن کر کہیں جا رہی ہے ۔۔۔ ساتھ اپنے یادوں کی مالا لیے جا رہی ہے ۔۔۔

وقت ذرا دھیرے سے چل ۔۔۔ میرا بہت کچھ پیچھے رہ گیا ہے ۔۔۔ آج یوں گھر میں اکیلے بیٹھے ہوۓ ۔۔۔ پرانی البم کا بکس نکالے ہوۓ ۔۔۔ آنکھوں پہ چشمہ لگاۓ ہوۓ ۔۔۔ ماضی کے دریچے کھولے جا رہی ہوں ۔۔۔ اشکوں کی بارش میں بھیگے جا رہی ہوں ۔۔۔

وقت ذرا دھیرے سے چل ۔۔۔ میرا بہت کچھ پیچھے رہ گیا ۔۔۔ سورج سا باپ ۔۔۔ چاند سے ماموں ۔۔۔ پھولوں سی پھوپھیاں۔۔۔ ماں سی ماسیاں ۔۔۔ برگد سے بزرگ ۔۔۔ دیوار سے دوست ۔۔۔ دلفریب سے احساسات ۔۔۔

وقت ذرا دھیرے سے چل ۔۔۔ میرا بہت کچھ پیچھے رہ گیا ہے ۔۔۔ میرے پیاروں کی بےشمار یادیں ۔
کچھ آنسو۔۔۔ کچھ ہنسی۔۔۔ ڈھیر سی باتیں ۔۔۔ انمول سے رشتے اور بے پناہ چاہتیں ۔۔۔ خوبصورت سے دن اور حسین سی راتیں ۔۔۔ تھوڑی سی تکلیفیں اور بیش بہا راحتیں ۔۔۔