تین سو بہترین جامعات میں سے چھ پاکستانی

یونیورسٹیوں کی درجہ بندی کرنے والی برطانوی عالمی ایجنسی ‘ کُئیکوریلی سائمنڈز’ Quacqarelli Symonds نے ایشیا کی تین سو اہم یونیورسٹیوں میں پاکستان کی صرف چھ یونیورسٹیوں کو شامل کیا ہے۔

ایشیا کی تین سو بہترین یونیورسٹیوں میں سے پہلی پانچ یونیورسٹیوں میں پاکستان، بھارت اور بنگلہ دیش کی کوئی یونیورسٹی شامل نہیں۔
 

اس فہرست میں ہانگ کانگ یونیورسٹی آف سائنس اینڈ ٹیکنالوجی پہلے، نیشنل یونیورسٹی آف سنگاپور دوسرے، یونیورسٹی آف ہانگ کانگ تیسرے، سیؤل نیشنل یونیورسٹی چوتھے اور چائنیز یونیورسٹی آف ہانگ کانگ پانچویں نمبر پر ہیں۔

پاکستان کی جن چھ یونیورسٹیوں کو فہرست میں شامل کیا گیا ہے ان میں نیشنل یونیورسٹی آف سائنس اینڈ ٹیکنالوجی (نسٹ) کا ایک سو آٹھواں نمبر ہے۔ کراچی یونیورسٹی کو ایک سو اکانوے سے دو سو کی درجہ بندی میں شامل کیا گیا ہے جبکہ آغا خان یونیورسٹی دو سو ایک سے ڈھائی سو اور لاہور یونیورسٹی آف منیجمنٹ سائنسز (لمز) دو سو اکیاون سے تین سو کی درجہ بندی میں شامل ہے۔

اسلام آباد میں بی بی سی کے نامہ نگار اعجاز مہر کا کہنا ہے کہ پاکستان میں ایک سو سینتیس یونیورسٹیز ہیں جو ہائر ایجوکیشن کمیشن کی منظور شدہ ہیں۔ جس میں چوہتر سرکاری شعبے اور تریسٹھ نجی شعبے میں چل رہی ہیں۔

یونیورسٹیز کی درجہ بندی کرنے والی برطانوی ایجنسی ’کیو اے‘ نے دنیا کی سات سو یونیورسٹیز کی درجہ بندی کا اعلان بھی کیا ہے۔ جس میں دنیا میں سب سے بہترین ادارہ یونیورسٹی آف کیمبرج برطانیہ کو قرار دیا گیا ہے۔