برفانی گاؤں جہاں کا ہر فرد خوش ہے

دنیا میں ہر جگہ ہر طرح کے افراد پائے جاتے ہیں جن میں سے کچھ اگر خوشحال زندگی بسر کر رہے ہوتے ہیں تو بعض اپنے اردگرد موجود ماحول سے ناراض نظر آتے ہیں- لیکن دنیا میں ایک گاؤں ایسا بھی ہے جہاں کا ہر فرد خوش دکھائی دیتا ہے - اور اس خوشی کی بنیادی وجہ گاؤں کا پرسکون اور خوبصورت ماحول ہے-

انٹارکٹیکا کے اس چھوٹے سے گاؤں میں جرائم نہ ہونے کے برابر ہے، ٹریفک کا شور بھی نہیں اور تنخواہوں کیلئے ملنے والے چیک بھی چلی کے دیگر علاقوں کے مقابلے میں بہت اچھے ہیں۔ اور سب سے بڑھ کر یہاں موجود پینگوئن بہت خوبصورت ہیں۔
 

لیکن گاؤں لاس ایسٹریلاس کے لوگوں پر سردیوں کا موسم بہت گراں گزرتا ہے۔ سرد ہوائیں یہاں چنگھاڑتی رہتی ہیں اور درجہ حرارت منفی چالیس تک گرجاتا ہے۔ اس حالت میں گھر سے باہر نکل کر سانس لینا بھی دو بھر ہوجاتا ہے۔

اسی لئے یہاں آنے والوں کی تعداد بھی بہت کم ہے۔

' باقی براعظم ( کونٹی نینٹ) کے مقابلے میں یہاں رہنا تفریح سے بھرپور ہے،' لاس ایسٹریلاس کے ایک چھوٹے سے اسکول کے پرنسپل ہوزے کاریلان روزالیس کا کہنا ہے کہ ' مشکل یہ ہے کہ ہمیں کئی دن گھر میں بند رہ کر گزارنا ہوتے ہیں، مثلاً گزشتہ سردیوں میں موسم اتنا شدید تھا کہ ہم نے آٹھ دن گھر میں بند رہ کر گزارے۔'

لاس ایسٹریلاس، انٹارکٹک خطے میں موجود کنگ جارج جزیرے پر واقع ہے۔

یہ گاؤں 30 سال قدیم ہے اور اس کی آبادی 64 افراد کے قریب ہے۔ البتہ گرمیوں کے موسم میں یہاں کی آبادی میں اضافہ دیکھنے میں آتا ہے اور اس وقت یہ تعداد 100 سے بھی تجاوز کر جاتی ہے-

یہ گاؤں ایک پوسٹ آفس، ایک بینک، دس مکانات، ایک جمنازیم، ایک چھوٹے سے شاپنگ سینٹر اور ایک اسکول پر مشتمل ہے جس میں صرف چھ بچے پڑھتے ہیں۔ یہ پریذیڈنٹے ایڈورڈو فرائی چلین ایئر بیس کا حصہ ہے۔

یہاں رہنے والے افراد کا تعلق ان فوجیوں سے ہے جو فضائی اڈے پر ملازم ہیں۔