ذی الحجہ کا پہلا عشرہ اور قربانی کے احکام و مسائل
(Muhammad Najeeb Qasmi, Riyadh)
بسم اﷲ الرحمن الرحیم
اَلْحَمْدُ لِلّٰہِ رَبّ الْعَالَمِیْن، وَالصَّلَاۃُ وَالسَّلَامُ عَلَی
النَّبِیِّ الْکَرِیمِ وَعَلٰی اٰلِہِ وَاَصحَابِہِ اَجْمَعِین۔
ماہ ِ ذی الحجہ کا پہلا عشرہ:
اﷲ تعالیٰ نے قرآن کریم (سورۃ الفجر آیت نمبر ۲)میں ذی الحجہ کی دس راتوں
کی قسم کھائی ہے (وَالْفَجْرِ وَلَیَالِ عَشْرٍ) جس سے معلوم ہوا کہ ماہ ذی
الحجہ کا ابتدائی عشرہ اسلام میں خاص اہمیت کا حامل ہے۔ حج کا اہم رکن:
وقوف عرفہ اسی عشرہ میں ادا کیا جاتا ہے، جو اﷲ تعالیٰ کے خاص فضل وکرم کو
حاصل کرنے کا دن ہے۔ غرض رمضان کے بعد ان ایام میں اخروی کامیابی حاصل کرنے
کا بہترین موقع ہے۔ لہذا ان میں زیادہ سے زیادہ اﷲ کی عبادت کریں، اﷲ کا
ذکر کریں، روزہ رکھیں، قربانی کریں۔ احادیث میں ان ایام میں عبادت کرنے کے
خصوصی فضا ئل وارد ہوئے ہیں جن میں سے چند احادیث ذکر کررہا ہوں:
٭ حضرت عبداﷲ بن عباس رضی اﷲ عنہما سے روایت ہے کہ حضور اکرم ﷺنے ارشاد
فرمایا: کوئی دن ایسانہیں ہے جس میں نیک عمل اﷲ تعالیٰ کے یہاں ان دس دنوں
کے عمل سے زیادہ محبوب اور پسندیدہ ہو۔ (صحیح بخاری )
٭ حضرت عبداﷲ بن عباس رضی اﷲ عنہماسے روایت ہے کہ حضور اکرم ﷺنے فرمایا: اﷲ
تعالیٰ کے نزدیک عشرۂ ذی الحجہ سے زیادہ عظمت والے دوسرے کوئی دن نہیں ہیں،
لہذا تم ان دنوں میں تسبیح وتہلیل اور تکبیر وتحمید کثرت سے کیا کرو۔
(طبرانی) ان ایام میں ہر شخص کو تکبیر تشریق پڑھنے کا خاص اہتمام کرنا
چاہئے، تکبیر تشریق کے کلمات یہ ہیں: اَللّٰہُ اَکْبَرُ۔ اَللّٰہُ
اَکْبَرُ۔ لَآ اِلٰہ الَّا اللّٰہُ۔ وَاللّٰہُ اَکْبَر۔ اللّٰہُ اَکْبَر۔
وَلِلّٰہِ الْحَمْدُ۔
عرفہ کے دن کا روزہ:
حضرت قتادہ رضی اﷲ عنہ سے روایت ہے کہ حضور اکرم ﷺ نے ارشاد فرمایا: عرفہ
کے دن کے روزے کے متعلق میں اﷲ تعالیٰ سے پختہ امید رکھتا ہوں کہ وہ اس کی
وجہ سے ایک سال پہلے اور ایک سال بعد کے گناہوں کو معاف فرمادیں گے۔ ( صحیح
مسلم) مذکورہ حدیث سے معلوم ہوا کہ عرفہ کے دن کا ایک روزہ ایک سال پہلے
اور ایک سال بعد کے گناہوں کی معافی کا سبب بنتا ہے۔ لہذا ۹ ذی الحجہ کے دن
روزہ رکھنے کا اہتمام کریں۔
وضاحت: اختلاف مطالع کے سبب مختلف ملکوں میں عرفہ کا دن الگ الگ دنوں میں
ہو تو اس میں کوئی اشکال نہیں، کیونکہ یوم عیدالفطر، یوم عید الاضحی، شب
قدر اور یوم عاشورہ کے مثل ہر جگہ کے اعتبار سے جو دن عرفہ کا قرار پائے گا
اُس جگہ اُسی دن میں عرفہ کے روزہ رکھنے کی فضیلت حاصل ہو گی انشاء اﷲ۔
قربانی کی حقیقت:
قربانی کا عمل اگرچہ ہر امت کے لئے رہا ہے جیساکہ اﷲ تبارک وتعالیٰ کا
ارشاد ہے: وَ لِکِلِّ اُمَّۃٍ جَعَلْنَا مَنْسِکًا لِیَذْکُرُوا اسْمَ
اللّٰہِ عَلَی مَا رَزَقَہُمْ مِنْ بَہِیْمَۃِ الْاَنْعَامِ (سورۃ الحج ۳۴)
ہم نے ہر امت کے لئے قربانی مقرر کی تاکہ وہ چوپائیوں کے مخصوص جانوروں پر
اﷲ کا نام لیں جو اﷲ تعالیٰ نے عطا فرمائے۔ لیکن حضرت ابراہیم اور حضرت
اسماعیل علیہما السلام کی اہم وعظیم قربانی کی وجہ سے قربانی کو سنت
ابراہیمی کہا جاتا ہے اور اسی وقت سے اس کو خصوصی اہمیت حاصل ہوگئی۔ چنانچہ
حضرت ابراہیم اور حضرت اسماعیل علیہما السلام کی عظیم قربانی کی یاد میں اﷲ
تعالیٰ کے حکم پر حضور اکرم ﷺ کی اتباع میں جانوروں کی قربانی کی جاتی ہے
جو قیامت تک جاری رہے گی انشاء اﷲ۔ اس قربانی سے ہمیں یہ سبق ملتا ہے کہ ہم
اﷲ کی اطاعت اور فرمانبرداری میں اپنی جان ومال ووقت ہر قسم کی قربانی کے
لئے تیار ہیں۔
حضوراکرم ﷺنے حجۃ الوداع کے موقع پر سو اونٹوں کی قربانی پیش فرمائی تھی جس
میں سے ۶۳ اونٹ کی قربانی آپ ﷺ نے اپنے مبارک ہاتھوں سے کی تھی اور بقیہ ۳۷
اونٹ حضرت علی رضی اﷲ عنہ نے نحر (یعنی ذبح) فرمائے۔ (صحیح مسلم ۔حجۃ النبی
ﷺ) یہ حضور اکرم ﷺ کے ارشاد (ذی الحجہ کی ۱۰ تاریخ کو کوئی نیک عمل اﷲ
تعالیٰ کے نزدیک قربانی کا خون بہانے سے بڑھ کر محبوب اور پسندیدہ نہیں) کا
عملی اظہار ہے اور اس عمل میں اُن حضرات کا بھی جواب ہے جو مغربی تہذیب سے
متاثر ہوکر کہہ دیتے ہیں کہ جانوروں کی قربانی کے بجائے غریبوں کو پیسے
تقسیم کردئے جائیں ۔ اسلام نے جتنا غریبوں کا خیال رکھا ہے اس کی کوئی مثال
کسی دوسرے مذہب میں نہیں ملتی، بلکہ انسانیت کو غریبوں اور کمزوروں کے درد
کا احساس شریعت اسلامیہ نے ہی سب سے پہلے دلایا ہے۔ غرباء ومساکین کا ہر
وقت خیال رکھتے ہوئے شریعت اسلامیہ ہم سے مطالبہ کرتی ہے کہ ہم عید الاضحی
کے ایام میں حضرت ابراہیم اور حضرت اسماعیل علیہما السلام کی عظیم قربانی
کی یاد میں اپنے نبی اکرم ﷺ کی اتباع کرتے ہوئے قربانی میں بڑھ چڑھ کر حصہ
لیں، جیسا کہ ساری انسانیت کے نبی حضور اکرم ﷺ نے ارشاد فرمایا: کسی کام
میں مال خرچ کیا جائے تو وہ عید الاضحی کے دن قربانی میں خرچ کئے جانے والے
مال سے زیادہ فضیلت نہیں رکھتا۔ (سنن دار قطنی، سنن کبری للبیہقی)
اِن دِنوں بعض حضرات نے باوجودیکہ کہ انہوں نے قربانی کے سنت مؤکدہ اور
اسلامی شعار کا موقف اختیار کیا ہے ۱۴۰۰ سال سے جاری وساری سلسلہ کے خلاف
اپنے اقوال وافعال سے گویا یہ تبلیغ کرنی شروع کردی ہے کہ ایک قربانی پورے
خاندان کے لئے کافی ہے اور قربانی کم سے کم کی جائے جو سراسر قرآن وحدیث کی
روح کے خلاف ہے، کیونکہ حضور اکرم ﷺ کے اقوال وافعال کی روشنی میں امت
مسلمہ کا اتفاق ہے کہ ان ایام میں زیادہ سے زیادہ قربانی کرنی چاہئے۔
دیگر اعمال صالحہ کی طرح قربانی میں بھی مطلوب ومقصود رضاء الہی ہونی
چاہئے، جیساکہ اﷲ تعالیٰ ارشاد فرماتا ہے: اِنَّ صَلاتِیْ وَنُسُکِیْ
وَمَحْےَایَ وَمَمَاتِیْ لِلّٰہِ رَبِّ الْعَالَمِےْن (سورۃ الانعام ۱۶۲)
میری نماز، میری قربانی، میرا جینا، میرا مرنا سب اﷲ کی رضامندی کے لئے ہے
جو تمام جہانوں کا پالنے والا ہے۔ نیز اﷲ جلّ شانہ کا فرمان ہے: لَن
ےَّنَالَ اللّٰہَ لُحُوْمُہَا وَلَا دِمَاؤُہَا وَلٰکِن ےَّنَالُہُ
التَّقْوٰی مِنْکُمْ (سورۃ الحج ۳۷) اﷲ کو نہ اُن کا گوشت پہنچتا ہے نہ اُن
کا خون، لیکن اس کے پاس تمہارا تقویٰ پہنچتا ہے۔
قربانی کی اہمیت وفضیلت:
٭ حضرت عبداﷲ بن عمر رضی اﷲ عنہما فرماتے ہیں کہ حضور اکرم ﷺ نے مدینہ
منورہ میں دس سال قیام فرمایا (اس قیام کے دوران) آپ ﷺ قربانی کرتے رہے۔
(ترمذی ۔ابواب الاضاحی) غرضیکہ حضورا کرم ﷺ نے مدینہ منورہ کے قیام کے
دوران ایک مرتبہ بھی قربانی ترک نہیں کی باوجویکہ آپ ﷺکے گھرمیں بوجہ قلت
طعام کئی کئی مہینے چولہا نہیں جلتا تھا۔
٭ حضرت زید بن ارقم رضی اﷲ عنہ سے روایت ہے کہ ایک مرتبہ صحابۂ کرام رضی اﷲ
عنہم نے حضور اکرم ﷺ سے سوال کیا، یا رسول اﷲ! یہ قربانی کیا ہے؟ (یعنی
قربانی کی حیثیت کیا ہے؟) آپ ﷺ نے ارشاد فرمایا: تمہارے باپ حضرت ابراہیم
علیہ السلام کی سنت (اور طریقہ) ہے۔ صحابۂ کرام نے عرض کیا: ہمیں قربانی سے
کیا فائدہ ہوگا؟ حضور اکرم ﷺنے ارشاد فرمایا: ہر بال کے بدلے میں ایک نیکی
ملے گی۔ صحابۂ کرام رضی اﷲ عنہم نے عرض کیا: یا رسول اﷲ! اون کے بدلے میں
کیا ملے گا؟ حضور اکرم ﷺ نے ارشاد فرمایا: اون کے ہر بال کے بدلے میں (بھی)
نیکی ملے گی۔ (سنن ابن ماجہ ۔ باب ثواب الاضحیہ)
٭ ام المؤمنین حضرت عائشہ رضی اﷲ عنہا سے روایت ہے کہ نبی اکرم ﷺنے ارشاد
فرمایا: ذی الحجہ کی ۱۰ تاریخ کو کوئی نیک عمل اﷲ تعالیٰ کے نزدیک قربانی
کا خون بہانے سے بڑھ کر محبوب اور پسندیدہ نہیں اور قیامت کے دن قربانی
کرنے والا اپنے جانور کے بالوں ، سینگوں اور کھروں کو لے کر آئے گا (اور یہ
چیزیں اجروثواب کا سبب بنیں گی) اور قربانی کا خون زمین پر گرنے سے پہلے اﷲ
تعالیٰ کے نزدیک شرف قبولیت حاصل کرلیتا ہے ، لہذا تم خوش دلی کے ساتھ
قربانی کیا کرو ۔ (ترمذی ۔ باب ما جاء فی فضل الاضحیہ)
٭ حضرت عبداﷲ بن عباس رضی اﷲ عنہما سے روایت ہے کہ حضور اکرم ﷺ نے ارشاد
فرمایا: کسی کام میں مال خرچ کیا جائے تو وہ عید الاضحی کے دن قربانی میں
خرچ کئے جانے والے مال سے زیادہ فضیلت نہیں رکھتا۔ (سنن دار قطنی باب
الذبائح، سنن کبری للبیہقی ج۹ ص ۲۶۱)
قربانی واجب ہے:
قربانی کو واجب یا سنت مؤکدہ قرار دینے میں زمانۂ قدیم سے اختلاف چلا آرہا
ہے، مگر پوری امت مسلمہ متفق ہے کہ قربانی ایک اسلامی شعار ہے اور جو شخص
قربانی کرسکتا ہے اس کو قربانی کرنے میں کوئی کوتاہی نہیں کرنی چاہئے خواہ
اس کو واجب کہیں یا سنت مؤکدہ یا اسلامی شعار۔ حضور اکرم ﷺ مدینہ منورہ میں
ہمیشہ قربانی کیا کرتے تھے باوجودیکہ آپ ﷺکے گھر میں اشیاء خوردنی نہ ہونے
کی وجہ سے کئی کئی مہینے تک چولہا نہیں جلتا تھا۔ ۸۰ ہجری میں پیدا ہوئے
حضرت امام ابوحنیفہ ؒ نے قرآن وحدیث کی روشنی میں قربانی کو واجب قرار دیا
ہے، حضرت امام مالکؒ اور حضرت امام احمد ابن حنبلؒ کی ایک روایت بھی قربانی
کے وجوب کی ہے۔ ہندوپاک کے جمہور علماء نے بھی وجوب کے قول کو اختیار کیا
ہے، کیونکہ یہی قول احتیاط پر مبنی ہے۔ علامہ ابن تیمیہ ؒ نے بھی قربانی کے
وجوب کے قول کو اختیار کیا ہے۔ قربانی کے وجوب کے لئے متعدد دلائل میں سے
چند پیش خدمت ہیں:
۱) اﷲ تبارک وتعالیٰ قرآن کریم (سورۃ الکوثر) میں ارشاد فرماتا ہے: فَصَلِّ
لِرَبِّکَ وَانْحَرْ آپ اپنے رب کے لئے نماز پڑھیں اور قربانی کریں۔ اس آیت
میں قربانی کرنے کا امر (یعنی حکم) دیا جا رہا ہے اور امر عموماً وجوب کے
لئے ہوا کرتا ہے جیساکہ مفسرین کرام نے اس آیت کی تفسیر میں تحریر کیا ہے۔
علامہ ابوبکر جصاص ؒ (ولادت ۳۰۵ھ) اپنی کتاب(احکام القرآن) میں تحریر کرتے
ہیں : حضرت حسن بصریؒ فرماتے ہیں کہ اس آیت (فَصَلِّ لِرَبِّکَ) میں جو
نماز کا ذکر ہے اس سے عید کی نماز مراد ہے اور (وَانْحَرْ) سے قربانی مراد
ہے۔ مفسر قرآن شیخ ابوبکر جصاص ؒ فرماتے ہیں کہ اس سے دو باتیں ثابت ہوتی
ہیں: ۱) عید کی نماز واجب ہے۔ ۲) قربانی واجب ہے۔
۲) حضرت ابوہریرہ رضی اﷲ عنہ سے روایت ہے کہ حضور اکرم ﷺ نے ارشاد فرمایا:
جس شخص کو قربانی کی وسعت حاصل ہو اور وہ قربانی نہ کرے تو وہ ہماری عید
گاہ کے قریب نہ بھٹکے۔ (سنن ابن ماجہ۔ باب الاضاحی ہی واجبہ ام لا، مسند
احمد ج۲ ص ۳۲۱، السنن الکبری ج۹ ص ۲۶۰ کتاب الضحایا) وسعت کے باوجود قربانی
نہ کرنے پر آپ ﷺ نے سخت وعید ارشاد فرمائی اور اس نوعیت کی سخت وعید واجب
کے چھوڑنے پر ہی ہوتی ہے، لہذا معلوم ہوا کہ قربانی کرنا واجب ہے۔
۳) حضرت جندب بن سفیان البجلی رضی اﷲ عنہ سے روایت ہے کہ میں عید الاضحی کے
دن حضور اکرم ﷺ کی خدمت میں حاضر ہوا۔ آپ ﷺ نے فرمایا: جس نے عید کی نماز
سے پہلے (قربانی کا جانور) ذبح کر دیا تو اسے چاہئے کہ اس کی جگہ دوسری
قربانی کرے اور جس نے (عید کی نماز سے پہلے) ذبح نہیں کیا تو اسے چاہئے کہ
وہ (عید کی نماز کے) بعد ذبح کرے۔ (صحیح بخاری۔ باب من ذبح قبل الصلاۃ
اعاد) حضور اکرم ﷺ نے عیدالاضحی کی نماز سے قبل جانور ذبح کرنے پر دوبارہ
قربانی کرنے کا حکم دیا حالانکہ اُس زمانہ میں صحابۂ کرام کے پاس مالی وسعت
نہیں تھی۔ یہ قربانی کے وجوب کی واضح دلیل ہے ۔
قربانی کس پر واجب ہے:
ہر صاحب حیثیت کو قربانی کرنی چاہئے جیساکہ حدیث میں گزراکہ حضور اکرم ﷺ نے
فرمایا: جس شخص کو قربانی کی وسعت حاصل ہو اور وہ قربانی نہ کرے تو وہ
ہماری عید گاہ میں نہ آئے۔ حضور اکرم ﷺکے اس فرمان سے واضح طور پر معلوم
ہوا کہ قربانی کے وجوب کے لئے صاحب وسعت ہونا ضروری ہے ۔ البتہ مسافر پر
قربانی واجب نہیں، جیسا کہ حضرت علی رضی اﷲ عنہ فرماتے ہیں کہ مسافر پر
قربانی واجب نہیں۔ (المحلی بالآثار لابن حزم ج ۶ ص ۳۷)
قربانی کے جانور:
بھیڑ، بکری، گائے، بھینس اور اونٹ (نر و مادہ) قربانی کے لئے ذبح کئے
جاسکتے ہیں جیساکہ اﷲ تعالیٰ فرماتا ہے : آٹھ جانور ہیں دو بھیڑوں میں سے
اور دو بکریوں میں سے، دو اونٹوں میں سے اور دو گائیوں میں سے۔ (سورۃ
الانعام ۱۴۳ و ۱۴۴)
قربانی کے جانوروں میں بھینس بھی داخل ہے کیونکہ یہ بھی گائے کی ایک قسم
ہے، لہذا بھینس کی قربانی بھی جائز ہے۔ امت مسلمہ کا اجماع ہے کہ بھینس کا
حکم گائے والا ہے۔ (کتاب الاجماع لابن منذر ص ۳۷) حضرت حسن بصری ؒ
(متوفی۱۱۰ھ) فرماتے ہیں کہ بھینس گائے کے درجہ میں ہے۔ (مصنف ابن ابی شیبہ
ج۷ ص ۶۵) حضرت امام سفیان ثوری ؒ (متوفی ۱۶۱ھ) فرماتے ہیں کہ بھینسوں کو
گائے کے ساتھ شمار کیا جائے گا۔ (مصنف عبد الرزاق ج۴ ص ۲۳) حضرت امام مالک
ؒ (متوفی ۱۷۹ھ) فرماتے ہیں کہ بھینس گائے ہی ہے (یعنی گائے کے حکم میں ہے)
(موطا مالک باب ما جاء فی صدقہ الفطر) ہندوپاک کے جمہور علماء کی بھی یہی
رائے ہے کہ بھینس گائے کے حکم میں ہے۔ سعودی عرب کے مشہور عالم شیخ محمد بن
عثیمین ؒ نے بھی بھینس کو گائے کے حکم میں شامل کیا ہے۔ بھینس عربوں میں
نہیں پائی جاتی ہے، اس لئے اس کاذکر قرآن کریم میں وضاحت سے نہیں ہے۔
(مجموع فتاوی ورسائل شیخ ابن عثیمین ؒ ۳۴/ ۲۵) موسوعہ فقہیہ کویتیہ میں میں
یہی مذکور ہے کہ بھینس گائے کے حکم میں ہے۔
جانور کی عمر:
قربانی کے جانوروں میں بھیڑ اور بکرا بکری ایک سال، گائے اور بھینس دو سال
اور اونٹ پانچ سال کا ہونا ضروری ہے، البتہ وہ بھیڑ اور دنبہ جو دیکھنے میں
ایک سال کا لگتا ہو اس کی قربانی بھی جائز ہے۔
قربانی کے جانور میں شرکاء کی تعداد:
اگر قربانی کا جانور بکرا، بکری، بھیڑ یا دنبہ ہے تو وہ صرف ایک آدمی کی
طرف سے کفایت کرتی ہے:حضرت عبد اﷲ بن عمر رضی اﷲ عنہما فرماتے ہیں کہ بکری
ایک آدمی کی طرف سے ہوتی ہے۔ (اعلاء السنن۔ باب ان البدنہ عن سبعۃ)
اگر قربانی کا جانور اونٹ، گائے یا بھینس ہے تو اس میں سات آدمی شریک
ہوسکتے ہیں۔ حضرت جابر رضی اﷲ عنہ فرماتے ہیں کہ ہم حضور اکرم ﷺ کے ساتھ حج
کا احرام باندھ کر نکلے تو آپ ﷺ نے حکم دیا کہ ہم اونٹ اور گائے میں سات
سات (آدمی) شریک ہوجائیں۔ (صحیح مسلم ۔ باب جواز الاشتراک الخ.) حضرت جابر
رضی اﷲ عنہ فرماتے ہیں کہ ہم نے حدیبیہ والے سال حضور اکرم ﷺ کے ساتھ
قربانی کی۔ چنانچہ اونٹ سات آدمیوں کی طرف اور گائے بھی سات آدمیوں کی طرف
سے ذبح کی۔ (صحیح مسلم ۔ باب جواز الاشتراک الخ.)
وضاحت: حجۃ الوداع اور صلح حدیبیہ کے موقع پر اونٹ اور گائے میں سات سات
آدمی شریک ہوئے تھے، اس پر قیاس کرکے علماء امت نے فرمایا ہے کہ عید الاضحی
کی قربانی میں بھی اونٹ اور گائے میں سات سات آدمی شریک ہوسکتے ہیں۔
قربانی کے ایام:قربانی کے تین ایام ہیں ۱۰ و ۱۱ و ۱۲ ذی الحجہ۔
٭ حضرت عبداﷲ بن عمر رضی اﷲ عنہما قرآن کی آیت (وَیَذْکَرُوا اسْمَ اللّٰہِ
فِیْ اَیَّامٍ مَعْلُوْمَاتٍ) کی تفسیر میں فرماتے ہیں کہ ایام معلومات سے
مراد یوم النحر (۱۰ ذی الحجہ) اور اس کے بعد دو دن ہیں۔ (تفسیر ابن ابی
حاتم الرازی ج۶ چ ۲۶۱)
٭ حضرت سلمہ بن اکوع رضی اﷲ عنہ سے روایت ہے کہ حضور اکرم ﷺ نے ارشاد
فرمایا: جو شخص قربانی کرے تو تیسرے دن کے بعد اس کے گھر میں قربانی کے
گوشت میں سے کچھ نہیں بچنا چاہئے۔ (صحیح بخاری۔ باب ما یؤکل من لحوم
الاضاحی) اس حدیث سے معلوم ہوا کہ قربانی کے دن تین ہی ہیں، اس لئے کہ جب
چوتھے دن قربانی کا بچا ہوا گوشت رکھنے کی اجازت نہیں تو پورا جانور قربان
کرنے کی اجازت کہاں سے ہوگی؟
وضاحت: تین دن کے بعد قربانی کا گوشت رکھنے کی ممانعت ابتداء اسلام میں تھی
بعد میں اجازت دے دی گئی کہ اسے تین دن بعد بھی رکھا جاسکتا ہے۔ (مستدرک
حاکم ج۴ ص ۲۵۹) اس سے کوئی یہ نہ سمجھے کہ جب تین دن کے بعد گوشت رکھنے کی
اجازت مل گئی تو تین دن کے بعد قربانی بھی کی جاسکتی ہے، اس لئے کہ گوشت تو
پورے سال بھی رکھا جاسکتا ہے تو کیا قربانی کی اجازت بھی سارے سال ہوگی؟
ہرگز نہیں۔ تین دن کے بعد قربانی کی اجازت نہ پہلے تھی اور نہ اب ہے۔
٭ حضرت علی رضی اﷲ عنہ سے بھی یہی منقول ہے کہ قربانی کے دن تین ہی ہیں۔
(موطا مالک ۔ کتاب الضحایا)
٭ حضرت عبداﷲ بن عباس رضی اﷲ عنہما فرماتے ہیں کہ قربانی کے دن ۱۰ ذی الحجہ
اور اس کے بعد کے دو دن ہیں، البتہ یوم النحر (۱۰ ذی الحجہ) کو قربانی کرنا
افضل ہے۔ (احکام القرآن للطحاوی ج ۲ ص ۲۰۵)
وضاحت: بعض علماء کرام نے مسند احمد میں وارد حدیث (کُلُّ اَیَّامِ
التَّشْرِیْقِ ذِبْحٌ) کی بنیاد پر فرمایا کہ اگر کوئی شخص ۱۲ ذی الحجہ تک
قربانی نہیں کرسکا تو ۱۳ ذی الحجہ کو بھی قربانی کی جاسکتی ہے۔ لیکن حضرت
امام ابوحنیفہؒ، حضرت امام مالکؒ اور حضرت امام احمد بن حنبل ؒ نے مذکورہ
بالا دلائل کی روشنی میں فرمایا ہے کہ قربانی صرف تین دن کی جاسکتی ہے۔
حضرت امام احمد بن حنبل ؒ نے خود اپنی کتاب میں وارد حدیث کے متعلق وضاحت
کردی ہے کہ یہ حدیث ضعیف ہے۔ نیز اصول حدیث ہے کہ ضعیف حدیث سے حکم ثابت
نہیں ہوسکتا ہے۔ حضرت امام احمد بن حنبل ؒ نے تحریر کیا ہے کہ متعدد صحابۂ
کرام مثلاً حضرت عبد اﷲ بن عمر اور حضرت عبد اﷲ بن عباس رضی اﷲ عنہم کی بھی
یہی رائے تھی۔ احتیاط کا تقاضا بھی یہی ہے کہ قربانی کو صرف تین دن تک
محدود رکھا جائے کیونکہ حضور اکرم ﷺ یا کسی ایک صحابی سے ۱۳ ذی الحجہ کو
قربانی کرنا ثابت نہیں ہے۔
قربانی کرنے والا ناخن اور بال نہ کاٹے یا کٹوائے:
٭ ام المؤمنین حضرت ام سلمہ رضی اﷲ عنہا سے روایت ہے کہ حضور اکرم ﷺنے
فرمایا: جب ذی الحجہ کا مہینہ شروع ہوجائے اور تم میں سے جو قربانی کرنے کا
ارادہ کرے تو وہ اپنے بال اور ناخن نہ کاٹے۔ ( مسلم) اس حدیث اور دیگر
احادیث کی روشنی میں قربانی کرنے والوں کے لئے مستحب ہے کہ ذی الحجہ کا
چاند نظر آنے کے بعد قربانی کرنے تک جسم کے کسی حصے کے بال اور ناخن نہ
کاٹیں۔ لہذا اگر بال یا ناخن وغیرہ کاٹنے کی ضرورت ہو تو ذی القعدہ کے آخر
میں فارغ ہوجائیں۔ |
|