پاکستانی ٹی وی گیم شوز٬ قوم بھکاری اور فائدہ کس کا؟

کون مفت کا مال پسند نہیں کرتا؟ ہم ایسی چیزوں کو زیادہ اہمیت دیتے ہیں جو بغیر کسی کوشش کے ہمارے ہاتھ آجائیں- یہ سوچ کسی بھی قوم کے لیے بڑا دھچکا ہوتی ہے- ایک دوسرے سے امیر بننے کی دوڑ کی جڑیں ہماری قوم میں مضبوط ہوتی چلی جارہی ہیں-

پاکستان کے الیکٹرونک میڈیا نے پاکستانی قوم کی اس سوچ کو انتہائی خوبصورت انداز میں کیش کیا ہے جس نے قوم کو ایک بھکاری کا روپ دے دیا ہے- پاکستان کے تقریباً ہر ٹی وی چینلز پر منعقد ہونے والے مختلف گیم شوز نے یہ تصور پیش کیا ہے کہ آپ صرف چند آسان سوالات کے جوابات دے کر ڈھیروں دلچسپ انعامات جیت سکتے ہیں- ابتدا میں یہ اندازہ لگایا گیا کہ یہ گیم شوز پی ٹی وی کے مشہور پروگرام “ نیلام گھر “ سے متاثر ہو کر شروع کیے گئے ہیں- لیکن پی ٹی وی کے اس پروگرام کا ایک مقام تھا اور اس کا آج کے گیمز شوز سے کوئی مقابلہ نہیں- حالیہ دکھائے جانے والے گیم شوز صرف پیسہ بنانے اور اپنے چینلز کی ریٹنگ بڑھانے کے سوا اور کچھ بھی نہیں-
 

“ تکا لگاؤ مسلمانوں “ ایک ایسے ہی بے بنیاد تصورات پر مبنی نشر کیے جانے والے گیم شوز میں سے ایک شو کے دوران بار بار بولا جانے والا ایک مقبول جملہ ہے- یہ جملہ گزشتہ سال رمضان جیو ٹرانسمیشن کے دوران مقبول ہوا- عامر لیاقت کو اس اقسام کے گیم شوز کی میزبانی کرنے والوں کا رہنما قرار دیا جاتا ہے- اگرچہ عامر لیاقت کا تجربہ اور مقبولیت طارق عزیز کے مقابلے میں کچھ بھی نہیں لیکن اس کے باوجود وہ ایک معقول ویورز شپ اور مداح حاصل کرنے میں کامیاب ہوگئے ہیں-

ابتدا میں عامر لیاقت حسین کی مقبولیت میں اس وقت اضافہ ہوا جب ایک ٹی وی پروگرام میں انہوں نے بطور مذہبی اسکالر ایک مذہبی پروگرام کی میزبانی کے فرائض سرانجام دیے- سب سے پہلے عامر لیاقت نے جیو پر “ انعام گھر “ کے نام سے ایک گیم شو متعارف کروایا جس سے متاثر ہو کر اے آر وائی ڈیجیٹل نے بھی “ جیتو پاکستان “ کے نام سے ایک گیم شو متعارف کروا دیا اور اس شو کی میزبانی فہد مصطفیٰ کرتے ہیں- ایک دوسرے سے متاثر ہونے کا یہ سلسلہ یہی نہیں تھما بلکہ اس کے بعد ہم ٹی وی نے “ جیت کا دم “ کے نام سے ایک ایسا ہی گیم شو متعارف کروا دیا اور اس شو کی میزبانی کے فرائص مقبول ٹی وی ایکٹر فیصل قریشی سرانجام دے رہے ہیں-