امداد باہمی کے عالمی دن 4
جولائی کے حوالے سے آنکھیں کھول دینے والی تحریر
ہمارے معاشرے میں امداد باہمی کو وہ اہمیت حاصل نہ ہو سکی جو ایک اسلامی
ملک ہونے کی حیثیت سے ہونی چاہیے تھی حالانکہ امداد باہمی کا درس ہمیں چودہ
سو برس قبل اسلام نے پہنچا دیا تھا ۔ قرآنِ کریم اور احادیث مبارکہ میں
باہمی امداد اور تعاون کی بڑی ترغیب دی گئی ہے۔ مسلمانوں کو ایک دوسرے کے
بھائی کہا گیا ہے ۔ہمارے ہاں بھائی ہی بھائی کو دکھ میں ،تکلیف میں ،تڑپتے
دیکھ کر خوش ہوتا ہے، اس کے دکھ دور کیا کرنے اسے دکھ دیتا ہے۔ قرآنِ کریم
میں ارشادِ باری ہے ترجمہ: نیکی اور تقویٰ کے کاموں میں ایک دوسرے کے ساتھ
تعاو ن کرو۔اس تعاون اور باہمی بھائی چارے کا تقاضا یہی ہے کہ مسلمان ایک
دوسرے کے ساتھ تعاون کریں اور ایک دوسرے کے لیے سہارا بن جائیں ۔یعنی امداد
باہمی کے اصولوں کے مطابق زندگی گزاریں۔
تمام لوگوں میں وہ شخص اﷲ تعالیٰ کو سب سے زیادہ محبوب ہے جو لوگوں کو سب
سے زیادہ فائدہ پہچانے والا ہو‘ اﷲ تعالیٰ کی سب سے زیادہ پسندیدہ نیکی یہ
ہے کہ ہماری وجہ سے کسی کی زندگی میں خوشی آجائے ،کسی کی تکلیف دور ہو جائے
،قرض کی ادائیگی کا انتظام ہو جائے،آدمی ہی آدمی کی دوا ہے ،ان کے خوش نصیب
ہونے میں کیا شک ہے جو دوسروں کے کام آتے ہیں ،ان کی ضرورتوں کو پورا کرتے
ہیں ،جن کا کوئی سہارا نہیں ہوتا ان کا سہارا بنتے ہیں ،محتاج ،ضرورت
مند،نادار،بے آسراکی مدد کرتے ہیں ۔امام کعبہ شیخ خالد الغامدی نے اسلام
آباد کی فیصل مسجد میں نماز جمعہ کی امامت کی ، ، خطبہ جمعہ میں امام کعبہ
کا کہنا تھاکہ دین کی بنیاد ایک ہونے پر ہے تفرقے میں نہیں ، ہمیں مشکلات
میں ایک دوسرے کی مدد کرنی چاہیے ۔ ہمارے معاشرے میں بعض افراد اتنے مال
دار ہیں کہ وہ لاکھو ں روپے گھر کی تزئین، درباروں پر چادریں ۔مسجدوں میں
چندے ،عمرے کرنے ،حج کرنے ، شادی بیاہ پر ، اپنی نمود و نمائش کے لیے خرچ
کر دیتے ہیں ۔
لیکن ان کا پڑوسی،ملازم،یا رشتہ دار بیماری کی دوا ،بچوں کے کپڑے،شام کے
کھانے کے لیے ترس رہا ہوتا ہے۔ایساکیوں؟ اس کی وجہ اسلام کی تعلیمات سے
ناآشنائی ہے ۔اسلام میں بتایاگیا ہے کہ مال کو جمع کرنے والوں کے منہ قیامت
کے دن انھی کے مال سے داغے جائیں گے اور کہا جائے گا کہ یہ ہے وہ مال جس کو
تم سنبھال کر رکھتے تھے ۔ ہمارے ہاں ایک فرد کا محل ،کوٹھی اور کئی مکان
اور سینکڑوں افرادسڑکوں ،پارکوں میں ،کرایہ کے مکان میں رہتے ہیں۔ان سب سے
پوچھ گچھ ہو گی وہاں صاحب مال لوگوں کو کٹہرے میں کھڑا کیا جائے گا۔اﷲ
تعالیٰ کا ارشاد ہے کہ وہی متقی لوگ بہشت کے باغوں میں اور چشموں کے کناروں
پر عیش سے رہیں گے جن کے مال کا ایک حصہ دنیا میں غریبوں اور ضرورت مندوں
پر خرچ ہوتا تھا (سورۃ الذاریات)جو دولت مند اپنی دولت کا ایک حصہ حاجت
مندوں کی کفالت پر خرچ کرتے ہیں ، وہ اعزاز و اِکرام کے ساتھ جنت میں داخل
ہوں گے (سورہ المعارج)اے نبی! لوگ آپ سے پوچھتے ہیں کہ کون سا مال خرچ کریں
؟ آپ کہہ دیں کہ جو ضرورت سے زیادہ ہو۔''(سورۃالبقرہ)یہ بھی فرما دیاکہ جو
لوگ ریا کاری کے ساتھ یا کسی پر احسان جتانے کی غرض سے اپنا مال خرچ کرتے
ہیں ، وہ کسی اجر و ثواب کے مستحق نہیں ہیں ۔ کیونکہ ریاکاری کا تعلق ایمان
سے نہیں ہے بلکہ کفر و منافقت سے ہے (سورۃ البقرہ)
قرآن مجید میں مسکین (سفید پوش) کی ضروریات پر توجہ دلائی گئی ہے ۔ (اور
ہاں تم جو خرچ کرو گے تو) ان حاجتمندوں کے لئے جو خدا کی راہ میں رکے بیٹھے
ہیں اور ملک میں کسی طرف جانے کی طاقت نہیں رکھتے (اور مانگنے سے عار رکھتے
ہیں) یہاں تک کہ نہ مانگنے کی وجہ سے ناواقف شخص ان کو غنی خیال کرتا ہے
اور تم قیافے سے ان کو صاف پہچان لو (کہ حاجتمند ہیں اور شرم کے سبب) لوگوں
سے (منہ پھوڑ کر اور) لپٹ کر نہیں مانگ سکتے اور تم جو مال خرچ کرو گے کچھ
شک نہیں کہ خدا اس کو جانتا ہے سورۃ البقرۃ کی آیت 273 )، اس آیت مبارکہ
میں ایسے ہی لوگوں پرصدقہ و خیرات کرنے کی تاکید کی گئی ہے ۔ اور حدیث میں
بھی ان لوگوں کا خاص خیال رکھنے کا کہا گیاہے ، کیونکہ عام مانگنے والے تو
دوسروں سے مانگ کر اپنی ضروریات پوری کرلیتے ہیں ، لیکن نہ مانگنے والے
محروم لوگ زیادہ حاجت مند ہوتے ہیں ،اس لئے قرآن و حدیث میں ان کے بارے میں
خصوصی حکم دیا گیا ہے ۔''نبی صلی اﷲ علیہ وسلم نے فرمایا کہ مسکین وہ نہیں
ہے جو لوگوں کے دروازے کا چکر لگاتا ہے اورلقمہ دو لقمے اور کھجور دو کھجور
لے کرلوٹتا ہے ، مسکین وہ ہے جو اتنا مال نہیں رکھتا کہ اپنی ضروریات پوری
کرے اور اس کی غربت کولوگ سمجھ نہیں پاتے کہ اسے صدقہ دیں، اور نہ ہی وہ
لوگوں کے سامنے کھڑے ہوکر ہاتھ پھیلاتا ہے ۔" یہ بھی ارشاد ہواکہ جو مالدار
لوگ یتیموں مسکینوں (سفید پوش ضرورت مند)کا خیال نہیں رکھتے ، وہ دولت کے
حریص اور پجاری ہیں ، ایسے لوگوں کا دین و ایمان سے کوئی واسطہ نہیں (سورۃالفجر)رسول
اﷲ صلی اﷲ علیہ و سلم پر جب پہلی وحی نازل ہوئی اور آپ نے اپنی کیفیت کو
اپنی زوجہ محترمہ ام المومنین سیدہ خدیجہ رضی اﷲ عنہا سے بیان فرمایاتو
انہوں نے اپنے شوہر کی پوری زندگی چھ جملوں میں بیان کر دی۔
یہ چھ جملے تمام حقوق العباد سے متعلق تھے اور دوسرے کے کام آنے خدمت کرنے
کے ہیں۔ کہ(1) آپ صلہ رحمی کرتے ہیں اور (2) ہر سچی بات کی تصدیق کرتے ہیں
اور(3) دوسروں کا بوجھ اٹھاتے ہیں اور(4) دوسروں کو کما کر دیتے ہیں ( بے
سہارا کا سہارا بنتے ہیں) اور (5) مہمان نوازی کرتے ہیں اور(6) ہر حق والے
کا ساتھ دیتے ہیں۔ ( صحیح بخاری و مسلم )ان چھ پوائنٹ ایک ایک پوائنٹ پر
کتاب لکھی جا سکتی ہے ،یہ کہا جا سکتا ہے کہ دین اسلام کی اساس ہی امداد
باہمی کے اصولوں پر رکھی گئی ہے ۔
امداد باہمی کا عالمی دن ہر سال جولائی کے پہلے ہفتہ کے روز منایا جاتا ہے
۔ اس سال یہ دن 4 جولائی 2015 کو منایا جا رہا ہے ۔اس دن کو منانے کا فیصلہ
اقوام متحدہ نے 1992میں کیا۔ اس دن کے منانے کا مقصدآگاہی دینا ہے کہ باہمی
تعاون و اشتراک کے ذریعے انفرادی اور اجتماعی مسائل کا حل بھی ممکن ہے ۔اس
دن کی مناسبت سے مختلف تنظیموں کے زیر اہتمام سیمینارز اور کانفرنسز ،ٹی وی
پروگرامز،اخبارات میں کالم و فیچر کا اہتمام کیا جاتا ہے جس سے عوام میں
امداد باہمی کے بارے شعور و آگاہی پیدا کیا جانا مقصود ہوتا ہے ۔
ایک دوسرے کی کفالت کرنا ،مل جل کر دکھ درد بانٹا، ایک دوسرے کی دیکھ بھال
کرنا ، اسے امداد باہمی کہتے ہیں ۔
امداد باہمی کا مطلب کسی کو قرض دینا نہیں بلکہ اس کی اس طرح مدد کرنا کہ
دوسرا اپنے پاؤں پر کھڑا ہو سکے ہے اس کے علاوہ چند افرد مل کر اگر ایک
دوسرے کی مدد سے ،مل جل کر ،ایک دوسرے کا سہارا بنیں تو اسے بھی امداد
باہمی کہیں گے ۔لیکن ہمارے ہاں امیر، غربت پر خوب تقاریر کرتے ہیں ۔، اس پر
لکھا جاتا ہے کسی کی غربت پر افسوس کا اظہار کیا جاتا ہے لیکن اس کے لیے جب
عملی قدم اٹھانے کی بات کی جائے تو سانپ سونگھ جاتا ہے ۔ |