رمضان المبارک اپنی تمام تر سعادتوں اور
رحمتوں کے ساتھ جلوہ فگن ہوچکا ہے ،اس مہینے میںاللہ کی طرف سے برکتوں کا
نزول اس تسلسل کے ساتھ ہوتا ہے کہ شاید ہی کوئی مومن ہو جو اس کی آمد اور
اس کے جلو میں آنے والی برکات سے محروم رہ جائے ، اس مہینے کی عظمت و تقدس
کا یہ عالم ہے کہ اس کے آتے ہی بڑے سے بڑے شرابی ، زناکاراور گنہگار خوف
زدہ ہو جاتے ہیں اور جز وقتی ہی سہی ان میں سے بیشتر افراد اپنی پرانی لتوں
کو چھوڑ کر اللہ کی طرف رجوع ہوجاتے ہیںاوربڑی حد تک یہ کوشش کرتے ہیں کہ
اپنےاندر خشوع و خضوع کی وہ کیفیت پیدا کرلیں ،جو خاص طور سے اللہ اور اس
کے رسول ؐکو مطلوب ہیں ، اس ماہ مبارک کی شان و شوکت بھی قابل دید ہوتی ہے
کہ رمضان کا چاند دکھائی دیتے ہی چہار سو ایک نورانی منظر پھیل جاتا ہےاور
ہر کوئی اس روحانیت بھرے ماحول سے حسب لیاقت مستفید ہوتا ہے، مساجد اس طرح
بھر جاتی ہیں کہ ذرا سا بھی تاخیر ہوئی تونماز کیلئے جگہ ملنی مشکل ہوجاتی
ہے،۔ آخر یہ کیفیت کیوں پیدا ہوتی ہے اور اس قدر خشیئت اور جذبہ ٔ
فرمانبرداری ہم میں کیوں ابھر آتا ہے،کیا ہم نے کبھی اس پر غور کیا۔وجہ
صاف ہے کہ اس ماہ مبارک کے تعلق سے ہمارے دلوں میں یہ یقین بیٹھ گیا ہے کہ
یہ خالص اللہ کا مہینہ ہے، اس پر اللہ کا خاص لطف و کرم ہے اور یہ مہینہ
اللہ کو اور اس کے رسول کوبے حد محبوب ہے ، بس اصل چیز یہی یقین ہے جو ہم
سے وہ سب کچھ کروا لیتا ہے جس کے مکلف ہم عام دنوں میں نہیں ہوتے ، داد و
دہش اور خیرات و صدقات کی رفتار بہت تیز ہوجاتی ہے ، بہت سے لوگ تو اس
بابرکت مہینے کے انتظار میں زکوٰۃکی ان رقومات کو بھی موقوف رکھتے ہیں، جس
کی فرضیت کسی اور مہینے میں ہوئی ہو ، جبکہ علماء کہتے ہیں کہ ایسا انسان
جس پر زکوٰۃ فرض ہوگئی ہے اور وہ زیادہ ثواب کی خواہش میں رمضان تک اسےروک
لے پھر اسی حال میں اسکی موت واقع ہو جائے تو ایسا شخص سخت گنہگار ہوگا ۔
کھانا پینا اور آرام کرنا انسانی فطرت ہی نہیں ضرورت میں بھی شامل ہے ،اب
ایسی صورت میں جب بندہ اپنی بھوک پیاس چھوڑ دے اور عیش و آرام کو تج کرخود
کو سرتا پااللہ کے حوالے کردے اور اپنی مرضی پر اللہ کی مرضی کو غالب
کردے۔تابعداری اور فرمانبرداری اسی کو کہتے ہیں ، صرف زبان سے اقرار کافی
نہیں اورریاکارانہ اعمال و افعال کی تو اللہ کے یہاں کوئی وقعت ہی نہیں ،
اس کے یہاں تو صرف خلوص اور وفاداری دیکھی جاتی ہے ، اللہ کے رسول ؐنے خطبہ
ٔ حجۃ الوداع کے موقع پر اسی اہم نکتے سے اپنی بات شرو ع کی تھی ، آپ نے
فرمایا تھا کہ آج سے نہ کسی گورے کو کسی کالے پر نہ کسی عجمی کو کسی عربی
پر نہ ہی کسی سرخ کو کسی سفید رنگت والے پر کوئی فوقیت ہے ، آج کے بعد سب
برابر ہیں اور کسی کو کسی پر کوئی برتری نہیں ، ہاں بس ایک ہی وصف ہے جو تم
کو ایک دوسرے سے ممتاز کرتاہے ،وہ ہے خوف الہٰی ،یعنی جس شخص کے اندر جتنا
ہی اللہ کا ڈر ہوگا اتنا ہی وہ صاحب عظمت اور برگزیدہ انسان ہوگا ۔ اس موقع
پر اللہ کے رسولؐ نے یہ بھی ارشاد فرمایا تھا کہ زمانہ ٔ جاہلیت کی ساری
ضلالتوں اور بدعتوں کو میں نے اپنے پیروں تلے کچل ڈالا ہے ، آج کے بعد ان
بری رسموں اور روایتوں کے قریب بھی نہ جانا۔ قول رسول ؐکے واسطے سے کیا
ہمیں اپنا جائزہ نہیں لینا چاہئے کہ سرور کائناتؐ کی اس تنبیہ پر ہم نے
کتنا دھیان دیا ہے؟ کیا زمانہ ٔ جاہلیت والی وہ ساری رسمیں اور ضلالتیں پھر
سے نہیں ہمارے درمیان دبے پاؤںچلی آئی ہیں اورہمارا حال یہ ہے کہ ان فتنہ
پردازیوں کوہم سمجھ نہیں پاتے یا پھرسمجھنے کی کوشش ہی نہیں کرتے ۔ظاہر ہے
رمضان کے تعلق سے جب یقین جم گیا تو مساجد بھر گئیں ، صدقات و خیرات میں
بارش کی کیفیت پیدا ہوگئی ،اوراس کا اجر بھی ہمیں ضرور ملے گا ، انشاءاللہ
۔لیکن ہم سے یہ نہیں کہا گیا ہے کہ تقوی ٰ اور فرمانبرداری کی یہ کیفیت تم
سے صرف رمضان ہی میں مطلوب ہے ، باقی ایام میں مساجد ویران رہیں تو رہیں ،
پڑوسی بھوک سے نڈھال رہے تو رہے ، انتہائی قریبی عزیز، بھائی بنداور
خاندانی افراد کیسی بھی کس مپرسی کی حالت میں ہوں ، ہمیں اس سے کیا ؟ دوست
احباب پھٹے حال ہوں ہماری بلا سے ۔قرآن میں کہا گیاہے کہ ناپ تول میں کمی
نہ کریں اور خرید فروخت کے دوران لین دین درست رکھیں ۔یہ وہ اوصاف ہیں جن
سے معاشرہ میںبحالی ٔ امن کی راہ ہموار ہوتی ہے ۔اسی طرح اور بھی مختلف
اعمال ہیں جن کا تعلق حقوق العباد سے ہے ،سرور کائناتؐ کی زندگی کے اوراق
حقوق العبادکی تمام تر حوصلہ افزائیوں سے بھرے پڑے ہیں اور ہم ہیں کہ انہیں
دریا برد کرنے پر تلے ہوئے ہیں ۔رہے نام اللہ کا ۔
|