بعد از خدا بزرگ توئی قصہ مختصر

(Wakeel Sain, )
نبی مکرم ﷺ کی حیات مبارکہ بعث سے لے کر وصال تک جامعیت و اکملیت کا اعلیٰ نمونہ ہے زندگی کا ہر پہلو چاہے سیاسی ہو یا سماجی ، معاشی ہو یا معاشرتی،تعلیمی ہو یا ثقافتی۔ حرب و ضرب ہو یا امن عامہ، داخلہ امور ہوں یا خارجہ، عدالتی معاملات ہوں یا انتظامی امور حتیٰ کہ خانگی معاملات میں بھی آپﷺ کی شخصیت علم و عمل کی آئینہ دار اور بے نظیرو بے مثال ہے۔گفتا ر و کردار میں مماثلت اور عادات و اطوار میں کمال آپﷺ کے ایسے اوصاف حمیدہ ہیں جن کا اعتراف مشرکین مکہ بھی کیا کرتے تھے اگر آپ ﷺ کی حیات طیبہ کا بغو ر جائزہ لیا جائے تو آپﷺ بحیثیت معلم، مبلغ، مفکر، مدبر، دانشور، مصلح، سپہ سالار، فاتح، حکمران، قانون دان،منصف ،آقا،شجاع، تاجر،سخی،راہبر،خاوند،باپ الغرض ہر لحاظ سے قرآن مجید کی عملی تفسیر نظر آتے ہیں غریبوں کی مدد کر نے والے ،یتیموں پر دست شفقت فرمانے والے ، بیواؤں کی غمخواری کر نے والے،پڑوسیوں کا خیال رکھنے والے،دشمنوں سے حسنِ سلوک سے پیش آنے والے،جودو سخا کا یہ عالم کہ درِ اقدس سے کوئی بھی خالی نہیں جاتا۔ لطف و کرم ایسا کہ بد ترین دشمنوں کو بھی معافی مل جاتی ہے انسان تو انسان چرند پرند بھی رحمت اللعالمینﷺ کے سایہ رحمت میں جگہ پاتے ہیں۔
ہر کہ عشق مصطفی ﷺسامان اوست
بحر وبر در گوشۂ دامان اوست

سرورِ انبیاء ، احمدِ مجتبیٰ، محمد مصطفیﷺ کی رفعت و عظمت اور توقیر و ثروت کا شما ر کیا ہو کہ جس کا مدح سِرا ربِ کائنات ہے اﷲ تبارک و تعالیٰ ملائک کی ہمراہی میں اپنے حبیبﷺ پر درود و سلام کے تحفے نچھاور کرتا ہے اور کہیں ـ" ورفعنا لک ذکرک" فر ما کر اپنے محبوب کے ذکر کو بلند و بر تر کرتا ہے اور کہیں ـ" ولسوف یعطیک ربک فترضی" فرما کر اپنی عطائے خاص سے اپنے حبیب کونوازتا اور اسے راضی کرتا ہے اور کہیں
" من یطع الرسول فقد اطا ع اﷲ" فرما کررسول کی فرمانبر داری کو اپنی اطاعت اور کہیں" قل ان کنتم تحبون اﷲ فا تبعونی یحببکم اﷲ" فر ما کرربِ ذوالجلال شاہ ِ بطحا ﷺ کی اتباع کو اپنی محبت کا وسیلہ قرار دیتا ہے۔
جو کرنی ہے جہانگیری تو محمدﷺکی غلامی کر
عرب کا تاج سر پہ رکھ خداوندِ عجم ہو جا

سرورِ عالم، امام الانبیاء، سرکارِ دو جہاںﷺ کی کِس کِس ادا کو بیان کریں انﷺکی حیات مبارکہ کے کِس کِس گوشے سے پردہ اُٹھائیں انہی کی خاطر تو بزمِ جہاں کو آراستہ کیا گیا کو ن ومکاں میں میلہ سجایا گیا لوح وقلم،کرسی و عرش،ارض و فلک،جن وملائک،شجر و حجراورثمر و بشر کو وجود بخشا گیاجو باعثِ تخلیق کائنات ہے جو وجہ" عرفان ذات" ہے بلا شبہ آپﷺ عالمین کے لیے سراپا رحمت اور آپﷺ کی حیات مبارکہ تمام انسانوں کے لیے بہترین نمونہ ہے۔شانِ مصطفی ﷺ ایک ایسا مو ضوع ہے کہ جس پر لکھنے کے لیے کائنات میں موجود درختوں کو کاٹ کر قلمیں بنا لی جائیں اور تما م سمندروں کا پانی سیاہی بن جائے تب بھی ذکر مصطفیٰ ﷺ کا ایک باب بھی مکمل نہ ہو گاثنائے محبو ب کِبریا ایک ایسا وصف ہے کہ جس کو بھی مل جائے اس کا مقدر جاگ اُٹھتا ہے خاکی زبان کو یارا نہیں کہ وہ صاحب ِلولاکﷺ کے صفات و کمالات کا اظہا ر کر سکے اور نہ ہی قلم میں اتنی طاقت ہے کہ وہ شانِ شاہِ اُممﷺ کا احاطہ کر سکے بس یہی کہنا مناسب ہو گا ۔
یاصا حب الجمال و یا سیّد البشر
من وجہک المنیرلقد نور القمر
لا یُمکن الثناء کما کان حقہٗ
Comments Print Article Print
 PREVIOUS
NEXT 
About the Author: Wakeel Sain

Read More Articles by Wakeel Sain: 16 Articles with 6011 views »
Currently, no details found about the author. If you are the author of this Article, Please update or create your Profile here >>
13 Dec, 2016 Views: 394

Comments

آپ کی رائے

مزہبی کالم نگاری میں لکھنے اور تبصرہ کرنے والے احباب سے گزارش ہے کہ دوسرے مسالک کا احترام کرتے ہوئے تنقیدی الفاظ اور تبصروں سے گریز فرمائیں - شکریہ