امت سید لولاکؐ سے خوف آتا ہے

(Khawaja Kaleem, )
رسول عربی ،خاتم الانبیا ﷺ کی عزت کی قسم ،میں نہیں سمجھتا کہ یہ اسلام کی تعلیمات ہیں ۔ کوئی غلط فہمی میں نہ رہے ،ببانگ دہل یہ کہتا ہوں کہ رسول اﷲ ؐ کے ناموس پر میرے ماں باپ اور اولاد بھی قربان ،لیکن غیر مسلموں کی عبادت گاہوں پر حملے اور دھاوے بولنا اسلام کیسے ہو سکتا ہے؟۔چکوال میں عین رسول اﷲ ؐکے یوم ولادت کے موقع پرایک قلیل گروہ کا احمدیوں کی عبادت گاہ پرحملہ جہالت ، رسول اﷲ ؐ کی تعلیمات سے لاعلمی کا عکا س اور اسلام کے منہ پر کالک ملنے کے مترادف ہے ۔ قادیا نی یا احمدی اگر ختم نبوت پر یقین نہیں رکھتے تو ان کے بارے میں پاکستان کی پارلیمنٹ ایک تاریخی فیصلہ کر چکی ،جس پر خط تنسیخ پھیر نے کی ہمت اب کسی میں نہیں۔ پاکستان میں بسنے والے قادیانیوں سے بھی گزارش ہے کہ اس فیصلے کو تسلیم کریں اور قومی دھارے میں شامل ہو کر اپنی حب الوطنی کو ثابت کردکھائیں ۔ پھر واضح کرتا ہوں !میرے بڑوں نے روح محمدی ؐ کو جس طور میرے دل و دماغ میں ڈالا ہے اسے کوئی نکال نہ سکے گا۔ بخدا میں نام محمد ؐ کا وکیل ہوں، ابوبکر ؓو عمرؓاور عثمان غنی ؓ کا غلام ہوں ،حید رکرارؓ کے نام سے قرار پاتاہوں لیکن کیا محمد عربی ﷺ پرایمان نہ رکھنے والے پر زمین تنگ کر دی جائے؟کیا اس کی جان کی حرمت برقرار نہ رہنے دی جائے؟کیا اس کا مال ومتاع لوٹ لیا جائے؟ کیا ان کی خواتین کی عزت محفوظ نہ رہے؟کیا ان کے بچوں سے محبت نہ کی جائے؟کیوں؟ایک کافراور مشرک کے بچوں سے بھی محبت مجھے میرے رسول ﷺ نے سکھائی ہے ۔ خود رسول اﷲ ؐ کی زندگی ہمارے لئے مشعل راہ ہے۔مذہب کی بنیا د پر کسی بھی انسان کی جان ومال کو نقصان پہنچانا محمدی تعلیمات کے بالکل برعکس ہے ۔ کتنے ہی معرکے ایسے ہیں جہاں خود رسول اﷲ ؐنے صحابہ کرام ؓ کو روانہ کرتے ہوئے غیر مسلموں کی عبادت گاہوں کونقصان پہنچانے ،ہتھیار ڈالنے والوں کو جان کی امان دینے ،عورتوں اور بچوں پر ہتھیار نہ اٹھانے کی تلقین کی ۔ایک سچے عاشق رسولؐ کے نزدیک قادیانی بھی تو غیرمسلم ہی ہیں ۔ ذرا تصور کیجئے ! اس سے بڑی گستاخی اور کیا ہو گی کہ ایک بڑھیا روزانہ رسول اﷲ ؐ کے جسم اطہر پر کوڑا پھینکتی ہے لیکن اﷲ کے رسولؐ راستہ نہیں بدلتے بلکہ جب وہ بیمار ہوتی ہے تو آمنہ کے لعل ؐ بے قرار ہوجاتے ہیں ، اس بڑھیا کی کٹیا کو شرف نیاز بخشتے ہیں اور ا س کی تیمار داری کرتے ہیں اور گھر کے کام کاج بھی نبٹاتے ہیں ۔یہ واقعہ تو ہمیں سکول کی ابتدائی کلاسوں میں پڑھایا گیا تھا پھر ہم کیسے اس سبق کو بھول سکتے ہیں ۔ اس سے بڑی اذیت اور کیا ہوگی کہ حرم پاک میں اﷲ کے رسول ؐ بارگاہ خداوندی میں سجدہ ریز ہیں اور کچھ ناپاک ہاتھوں نے غلاظت سے بھری اونٹ کی اوجڑی آپ کے سر پر ایسے باندھی کہ اﷲ کے رسول ؐ کا دم گھٹنے لگا۔ قریب تھا کہ آپ کی روح اقدس جسم اطہر کا ساتھ چھوڑ دیتی لیکن دو معطر اور مقدس ہاتھوں نے آگے بڑھ کر آپ کو اس اذیت سے نجات دلائی ۔ اور پھر طائف کی وادی کس کو بھول سکتی ہے جہاں رسول اﷲ ؐ پر اس قدر تشدد کیا گیا کہ آپ کے جسم اطہر سے خون پھوٹ پڑا اور پائے مبارک تک جا پہنچا ،چشم تصور سے دیکھئے کہ اﷲ کے نبی ؐ نے طائف میں کس قدر اذیت اور تکلیف سہی ،کوئی رستم زماں دیکھا ہے تاریخ عالم نے کہ جو اس سلوک کے بعد اپنے دشمنوں سے بدلا لینے کا خیال تک دل میں نہ لائے بلکہ الٹا ان کے حق میں دعائے خیر کرے اوراپنے خالق سے ان کیلئے ایمان کی دولت سے نوازے جانے کی التجا کرے۔کائنات کے خالق کے حکم سے فرشتہ حاضر خدمت ہوا اور کہا !اﷲ کے رسول ؐ اگر آپ کی اجازت ہو تو ان گستاخوں کو پہاڑوں میں کچل کر رکھ دوں ۔ میرے ماں باپ قربان ، جان ِ فاطمہؓکے چہرے پر مسکان بکھری اور فرمایا نہیں ، ہو سکتا ہے مجھے مبعوث کرنے والا ان کو نہیں تو ان کی اولاد کو ایمان کی دولت سے مالا مال کر دے اس لئے میں ان کے حق میں کچھ برا کرنے کی حمایت نہیں کر سکتا ۔ عر ب کی وہ گھاٹی کسے بھول سکتی ہے جہاں رسو ل اﷲ ؐ کواہل بیت اور صحابہ ؓکے ہمراہ محصور کردیا گیا۔تین برس تک سماجی بائیکاٹ کے بعد بھی اﷲ کے رسول ؐ نے صبر اور حکمت کا دامن نہیں چھوڑا اور پیار و محبت کے ساتھ اپنے رب کی مخلوق کو رب سے جوڑنے کے لئے بے قرار رہے۔رحمتہ اللعالمین کے عہدے پر مسند نشین ہونا ہر گز آسان نہ تھا ، موسیٰ کلیم اﷲ بھی گزرے، عیسیٰ روح اﷲ بھی ،ابراہیم خلیل اﷲ بھی اوراسمعیل ذبیح اﷲ بھی ،ہر پیغمبرعلیہ السلام نے توحید کا پرچار کرتے ہوئے بے شمار قربانیاں دیں۔تاریخ کے اوراق ان تکلیفوں اور اذیتوں سے بھرے پڑے ہیں جو اﷲ کی مبعوث کی گئی ہستیوں نے اپنی جانوں پر ہنستے مسکراتے برداشت کیں اوراپنے فرائض کے سلسلے میں اﷲ کے ہاں سرخرو ہوئے لیکن تاریخ عالم آمنہ کے لعل ؐ جیسی مثال پیش کرنے سے قاصر ہے اور رہے گی ۔

میں کوئی عالم یا مفتی نہیں بلکہ ایک عام سا مسلمان ہوں اور اتنا جانتا ہوں کہ پیار ، محبت اور حکمت سے آپ جنگل کے درندوں کو بھی اپنا تابع فرمان بنا کر سرکس میں ناچنے پر مجبور کر سکتے ہیں لیکن ڈنڈے کے زور پر آپ ایک چیونٹی کوبھی اپنا راستہ بدلنے پر مجبور نہیں کر سکتے ۔ اس لئے جو رسول عربی ؐ کے سچے غلام ہیں ، ان کی حقیقی تعلیمات پر عمل کرنے والے ہیں ، ان کے اسوہ حسنہ کے فروغ پر یقین رکھتے ہیں ان کو اب اپنا کردار ادا کرنا ہوگا۔ فرقہ واریت اور دہشتگردی نے اس قوم کے تن پر ایسے ایسے زخم لگائے ہیں جو بھرنے کے لئے ایک مدت درکار ہے لیکن اقوام عالم کی صف میں کھڑے ہوکر ہمیں ایک اور داغ اپنے دامن پر لگنے سے بچانا ہوگا۔ہمیں سوچنا ہو گا کہ کہیں ہم جانے انجانے اس جال میں تو نہیں پھنس رہے جس میں دشمن ہمیں پھنسانا چاہتا ہے تاکہ قدرتی اور انسانی وسائل سے بھرپور یہ ملک ترقی کی راہ پر گامزن نہ ہوسکے۔ ہمیں اپنے رسول ؐ کی تعلیمات کے عین مطابق صبر اور حکمت کے ساتھ پرایوں کو اپنا بناناہوگا۔ ایک ہندو شخصیت ’’اچاریہ پرامود کرشنن‘‘کی نعت کے اشعار ہیں ۔۔۔
سبق تم نے محبت کا ہراک انساں کو سکھلایا
مقدس راستہ دے کر دین دنیا میں پھیلایا
تمہی ساگر،تمہی دریا ،تمہی کشتی ،تمہی ملاح
رسول اﷲؐ،رسول اﷲؐ،رسول اﷲؐ،رسول اﷲؐ

اس لئے دوستو! میری گزارش ہے کہ نفرتوں کے الاؤ جلانے کی بجائے رسو ل اﷲ ؐ نے محبت کا جو درس انسانیت کو دیا ہے اسے ایک بار پھر سے دہرایاجائے تاکہ مملکت خداوندی امن و آشتی کے ساتھ ترقی و خوشحالی کے راستے پر گامزن ہو سکے ۔ کہیں ایسا نہ ہو کہ ایک بار پھر ہم پر یہ پھبتی کسی جائے کہ ،
امت سید لولاک ؐ سے خوف آتا ہے۔
Comments Print Article Print
 PREVIOUS
NEXT 
About the Author: Khawaja Kaleem

Read More Articles by Khawaja Kaleem: 46 Articles with 18993 views »
Currently, no details found about the author. If you are the author of this Article, Please update or create your Profile here >>
16 Dec, 2016 Views: 598

Comments

آپ کی رائے

مزہبی کالم نگاری میں لکھنے اور تبصرہ کرنے والے احباب سے گزارش ہے کہ دوسرے مسالک کا احترام کرتے ہوئے تنقیدی الفاظ اور تبصروں سے گریز فرمائیں - شکریہ