35 کروڑ لوگ جو کسی گنتی میں نہیں آتے

جب بھی کسی رپورٹ کے عنوان میں ’عالمی‘ آتا ہے تو جلد ہی اس میں عالمی حجم کے اعداد و شمار بھی نظر آتے ہیں جن میں لوگوں کی تعداد کروڑوں یا اربوں میں بتائی گئی ہوتی ہے۔

دنیا بھر کی خبریں تباہی اور غربت جیسے عالمی مسائل کو انھی اعداد و شمار کے تناظر میں نمایاں کرتی ہیں مگر اس قدر بڑے اعداد و شمار سے مسائل کو جانچنے سے شاید مسئلہ اپنے معنی ہی کھو دیتا ہے۔

اور شاید یہ عالمی حجم کے اعداد و شمار تھوڑے گمراہ کن بھی ہوتے ہیں۔
 

اقوام متحدہ کی تعلیماتی ایجنسی یونیسکو کی تعلیمی رپورٹ میں کہا گیا ہے کہ اس کے اعداد و شمار میں 35 کروڑ کی غلطی ہو سکتی ہے۔

یہ کوئی چھوٹی موٹی غلطی نہیں۔ یہ تعداد برطانیہ، جرمنی، فرانس، اٹلی، اور سپین کی مجموعی آبادی کے برابر ہے۔

یہ دنیا کے وہ افراد ہیں جو کسی بھی شمار قطار میں شمار نہیں آتے۔ یہ لوگ آبادی میں گنے ہی نہیں جاتے اور کسی رپورٹ میں دکھائی نہیں دیتے۔ یہ انتہائی غریب ہیں۔

بغیر دستاویزات کے یہ کروڑوں لوگ دنیا بھر میں شہروں کے گرد کچی آبادیوں میں بستے ہیں یا غیر قانونی تارکینِ وطن ہیں جو حکام کے پاس جا ہی نہیں سکتے۔

یونیسکو کی رپورٹ کے مطابق معلومات حاصل کرنے کے روایتی طریقے جیسے کہ سروے، خانہ شماری، اور پیدائش یا ہلاکتوں کے ریکارڈ صرف ان لوگوں کو شمار کرتی ہے جو کہیں باقاعدہ طور پر مقیم ہیں یا حکومتی سہولیات استعمال کرتے ہیں۔

لیکن کروڑوں افراد ہجرت کرتی ہوئی آبادیاں کا حصہ ہوتے ہیں اور ممکن ہے کہ ان کا شمار ہی نہ ہو سکے۔

سڑکوں پر رہنے والے بچوں کا شمار ان بچوں میں نہیں ہوتا جو سکولوں میں نہیں ہیں۔ انھیں غیر حاضر بھی نہیں تصور کیا جاتا۔ اسی طرح جب حکومت گھر سے گھر جا کر اعداد و شمار اکٹھے کرتی ہے تو بے گھر افراد شمار نہیں ہوتے۔

سیاسی تشدد سے جان بچا کر بھاگنے والے غیر پسندیدہ مہاجرین کو بھی ان کے میزبان ممالک کبھی اپنے اعداد و شمار میں شامل نہیں کرتے۔

یونیسکو کا اندازہ ہے کہ ترقی پذیر ممالک میں تقریباً 25 کروڑ گھرانے گنے نہیں جاتے اور دس کروڑ مزید افراد ماہرینِ شماریات کی پہنچ سے دور ہوتے ہیں۔
 

Partner Content: BBC URDU