کیا آپ جانتے ہیں معروف ہالی ووڈ اداکارہ انجلینا جولی، سابق امریکی صدر بارک اوباما اور مائیکرو سافٹ کے بانی بل گیٹس بائیں ہاتھ سے کام کرتے ہیں؟ آج ایسے ہی لوگوں یعنی بائیں ہاتھ والوں کا دن منایا جارہا ہے۔
13 اگست لیفٹ ہینڈرز ڈے یعنی بائیں ہاتھ والے لوگوں کا دن منانے کا مقصد ایسے افراد کی انفرادیت کا اعتراف کرنا اور ان کو درپیش چھوٹے چھوٹے مسائل کا احساس کرنا ہے۔
مذکورہ یوم کو منانے کا آغاز سنہ 1976 سے ایک امریکی فوجی اہلکار ڈین کیمپبل نے کیا تھا جنہوں نے لیفٹ ہینڈرز انٹرنیشل نامی ادارے کی بنیاد رکھی تھی۔
دنیا کی تاریخ میں متعدد معروف شخصیات بائیں ہاتھ والے گزری ہیں۔ جیسے کہ مشہور سائنسدان آئن اسٹائن، مشہور مصور لیونارڈو ڈاونچی، ریڈیم ایجاد کرنے والی نوبل انعام یافتہ سائنسدان میری کیوری، مشہور فسلفی ارسطو، چاند کو سر کرنے والا پہلا خلا نورد نیل آرم اسٹرونگ، فورڈ موٹر کمپنی کے مالک ہنری فورڈ، برطانوی شاہی خاندان کی ملکہ وکٹوریہ اور معروف امریکی مصنفہ ہیلن کیلر جو بیچلرز کی ڈگری حاصل کرنے والی دنیا کی پہلی نابینا خاتون تھیں۔
اسی طرح موجودہ دور میں بھی کئی نامور افراد بائیں ہاتھ والے موجود ہیں، جیسے کہ مائیکرو سافٹ کمپنی کے مالک بل گیٹس، سابق امریکی صدر باراک اوباما، برطانوی شہزادہ ولیم، فیس بک کے بانی مارک زکر برگ، مشہور فٹ بالر پیلے، آسکر ایوارڈ یافتہ مشہور ہدایت کار جیمز کیمرون، ہالی ووڈ اداکار ٹام کروز، اداکارہ انجلینا جولی، مشہور امریکی ٹی وی میزبان اوپرا ونفرے، بالی ووڈ اداکار امیتابھ بچن، ان کے صاحبزادے ابھیشک بچن اور پاکستانی کرکٹر میں وسیم اکرم، محمد عامر، وہاب ریاض شاہین شاہ آفریدی وغیرہ شامل ہیں۔
کیا آپ بائیں ہاتھ والے افراد کے بارے میں چند حیرت انگیز اور دلچسپ حقائق جانتے ہیں؟
1- یوں لگتا ہے کہ بائیں ہاتھ سے کام کرنے والے افراد دنیا میں کافی کامیابیاں سمیٹتے ہیں اور آپ کو یہ بات جان کر آپ کی معلومات میں اضافہ ہوجائے گا کہ دنیا کی مجموعی آبادی کا 10 فیصد حصہ بائیں ہاتھ سے اپنے کام سرانجام دینے والے لوگوں پر مشتمل ہے۔ مختلف تحقیق کے مطابق یہ انتہائی منفرد لوگ ہوتے ہیں۔ بائیں ہاتھ سے کام کرنے والے افراد میں مردوں کی تعداد زیادہ ہوتی ہے۔
2- پرانے دور میں بائیں ہاتھ والوں کو جادو ٹونے کرنے والا سمجھا جاتا تھا۔
3- الٹے ہاتھ سے مصافحہ کرنا بدتہذیبی کی علامت سمجھا جاتا ہے۔
4- بایاں ہاتھ استعمال کرنے والوں کو زیر آب ڈوبنے کا خطرہ کم ہوتا ہے کیونکہ سیدھے ہاتھ والوں کے مقابلے میں وہ الٹے ہاتھ سے زیادہ تیزی سے تیر سکتے ہیں۔
5- بائیں ہاتھ والے زیادہ تر ڈرائیور معاون ثابت ہوتے ہیں۔
6- بائیں ہاتھ سے کام کرنے والے افراد ملٹی ٹاسکنگ یعنی بیک وقت کئی کام سر انجام دے سکتے ہیں۔
7- ایک سائنسی تحقیق کے مطابق بائیں ہاتھ والے افراد زیادہ ذہین ہوتے ہیں، اس کے علاوہ وہ دماغ کے دونوں حصوں کا استعمال کرنے کی وجہ سے بائیں ہاتھ والے مختلف بیماریوں خصوصاً دل کے دورے سے دائیں ہاتھ والوں کی نسبت جلدی صحت حاصل کرلیتے ہیں۔
8- محققین کے مطابق تعلیمی اداروں سے فارغ التحصیل بائیں ہاتھ والے افراد میں کامیاب اور دولت مند بننے کے امکانات، سیدھے ہاتھ والے افراد سے کئی گنا زیادہ ہوتے ہیں۔