کورونا وائرس کے باعث پاکستان کے بند تعلیمی اداروں کو تین مراحل میں کھولنے کی تجویز کو بین الصوبائی وزراء تعلیم کے اجلاس کے ایجنڈے میں شامل کرلیا گیا ہے جو 4 جنوری کو وفاقی وزیر تعلیم شفقت محمود کی صدارت میں منعقد ہوگی۔
اجلاس کے دوران تجویز دی گئی ہے کہ پہلے مرحلے میں 25 جنوری سے پرائمری اسکول کھول دیئے جائیں، دوسرے مرحلے میں 4 فروری سے مڈل یا مساوی ادارے کھولے جائیں اور 15 فروری سے اعلیٰ تعلیمی ادارے کھول دیئے جائیں جبکہ اسکولوں اور بورڈز کے امتحانات مئی کے آخری ہفتے اور جون کے ابتداء میں لینے کی تجویز دی گئی ہے۔
موسم گرما کی تعطیلات مختصر کردی جائیں گی۔ نیا تعلیمی سال اگست سے شروع کیا جائے گا۔
اجلاس میں قومی تعلیمی پالیسی سے متعلق اور کورونا کی صورتحال کا
خصوصی جائزہ بھی لیا جائے گا جس کی روشنی میں تین مراحل میں تعلیمی ادارے کھولنے کی منظوری دی جائے گی۔