ملک بھر میں کڑاکے دار سردی کی لہر، کراچی میں سائبیرین ہواؤں نے ڈیرے ڈال لیے، پنجاب اور سندھ کے میدانی علاقوں میں دھند کا راج برقرار۔
محکمہ موسمیات کے مطابق کراچی میں سائبیرین ہواؤں کےچلنے کی وجہ سے موسم سرد ہو گیا ہے، شہرِ قائد میں درجۂ حرارت 5 اعشاریہ 8 ڈگری سینٹی گریڈ ریکارڈ کیا گیا۔
ڈائریکٹر محکمۂ موسمیات کا کہنا ہے کہ شہرِ قائد میں آج سائبرین ہواؤں کی رفتار تیز ہوسکتی ہے، جس سے ٹھنڈ میں مزید اضافہ متوقع ہے۔
دوسری جانب پنجاب اور سندھ کے میدانی علاقے شدید دھند کی لپیٹ میں ہیں، تاہم حدِ نگاہ انتہائی کم ہونے کے باعث بیشتر موٹر ویز بند کر دیئے گئے ہیں۔
ترجمان موٹروےپولیس نے بتایا کہ ایم 3 لاہور سے عبد الحکیم تک، ایم 4 پنڈی بھٹیاں سے شام کوٹ تک دھند کی وجہ سے بند کر دیا گیاہے۔
اس کے علاوہ ملتان سے خانیوال موٹر وے اور ایم 5 ملتان سے رحیم یار خان تک موٹر وے کو شدید دھند کے باعث بند کیا گیاہے۔
خیال رہے کہ قومی شاہراہ پر ان علاقوں میں حدنگاہ 20 میٹر ہے۔