افغان طالبان کی افغانستان میں عبوری حکومت قائم ہونے کے بعد، حکومت سازی اور مغربی ممالک کی حکومتوں کے افغانستان میں طالبان کی حکومت کو اب تک تسلیم نہ کرنے کے حوالے سے پیشرفت جاری ہے۔ تاہم امریکہ کے بعد فرانس کی حکومت نے بھی طالبان کی افغانستان میں حکومت کو تسلیم کرنے سے انکار کردیا ہے۔
جبکہ گزشتہ روز قطر کے وزیر خارجہ شیخ بن عبدالرحمان کی کابل کے صدارتی محل میں آمد کے موقع پر حکومتی وزراء نے ان کا پرتپاک استقبال کیا۔ بعد ازاں صدرتی محل میں وزیراعظم ملا محمد حسن اخوند کی سربراہی میں مذاکرات ہوئے جس میں موجودہ صورتحال پر تبادلہ خیال کیا گیا۔
اس کے علاوہ قطری وزیر خارجہ کی سابق افغان صدر حامد کرزئی اور سابق چیف ایگزیکٹو عبداللہ عبداللہ سے بھی ملاقات ہوئی۔ جہاں افغانستان کی تازہ ترین صورتحال پر بات چیت کی گئی۔
واضح رہے کہ قطر کا افغانستان سے امریکی انخلاء میں اہم کردار رہا ہے۔ جبکہ افغان طالبان اور امریکہ کے درمیان امن معاہدہ بھی قطر کے دارالحکومت دوحہ میں کیا گیا تھا۔
یاد رہے کہ افغانستان کے بیرون ممالک میں موجود اکاؤنٹس منجمد ہیں۔ جس کی وجہ سے افغانستان کو مالی بحران کا سامنا ہے۔