قدرت نے روئے زمین پر ایسے ایسے شاہکار پیدا کئے ہیں جنہیں دیکھ کر بے اختیار انسان رب کائنات کی کاریگری پر سبحان اللہ پکار اٹھتا ہے، ایسا ہی ایک شاندار نمونہ ان دنوں سوشل میڈیا پر وائرل ہے جس میں ایک اسٹیل نما کیڑا صارفین کی توجہ کا مرکز بنا ہوا ہے۔
دیکھنے میں تو ایسا لگتا ہے جیسے بڑی ہی مہارت کے ساتھ اسٹیل یا کسی دھات سے بنایا گیا یہ کوئی چھوٹا سا کھلونا ہے مگر یہ کوئی کھلونا نہیں بلکہ کریسینا لمباٹا نامی کیڑا ہے جو کوسٹا ریکا، میکسیکو اور جنوبی امریکا کے برساتی جنگلات میں پائے جانے والے بیٹل کی ایک قسم ہے۔ اس کی لمبائی 25 سے 35 ملی میٹر تک ہوتی ہے اور یہ دیکھنے میں چاندی جیسے محسوس ہوتے ہیں۔
ماہرین کے مطابق یہ انتہائی مضبوط بکتربند کیڑا اپنے سے ہزاروں گنا زیادہ وزن برداشت کر سکتا ہے یہ عموماً امریکا اور میکسیکو میں پایا جاتا ہے جہاں یہ درختوں کے تنوں یا چٹانوں کے نیچے رہتا ہے۔انسانوں نے آج تک جن بھی حشرات کا پتہ چلایا ہے، ان میں سب سے زیادہ مضبوط بیرونی خول رکھنے والے کیڑوں میں یہ بیٹل شامل ہے۔
بیٹل پہلے اڑ سکتے تھے مگر ارتقائی عمل کی وجہ سے ان کی اڑنے کی صلاحیت ختم ہوگئی، چنانچہ انھوں نے خود کو بچانے کے لیے یہ سخت ڈھال پیدا کرلی تاکہ بھوکے پرندے انھیں چونچ مار اپنی غذا نہ بنا لیں۔