شادی بیاہ کی تقریبات میں ویسے تو بارات گاڑی میں آتی ہے لیکن گھوڑے پر دولہا کی بارات آنے کا رواج آج بھی پاکستان اور بھارت کے مختلف شہروں میں برقرار ہے۔ ایسے موقعوں پر شور شرابا بھی دیکھنے میں آتا ہے مگر یہ انسانوں کے لیے تو بہت خوشگوار لمحہ ہوتا ہے لیکن جانور کے لیے نہیں۔
اب ایک ویڈیو سوشل میڈیا پر وائرل ہو رہی ہے جس میں دیکھا گیا کہ شادی کی تقریب میں ایک گھوڑا لوگوں کے شور کی وجہ سے بدک گیا جس سے چند افراد زخمی ہوگئے۔
یہ واقعہ بھارتی ریاست اترپردیش کے علاقے ہمیرپور میں پیش آیا جہاں شادی کی تقریب کے دوران گھوڑے نے خوف سے اچھلنا شروع کردیا جس سے باراتی زخمی ہوگئے۔ مہمانوں کو فوری طور پر اسپتال لے جایا گیا۔
رپورٹس کے مطابق گھوڑے کے بدکنے کا سبب اونچی آواز میں لگائے گئے گانے تھے، اس کے علاوہ باراتیوں کے مسلسل شور نے بھی گھوڑے کو آپے سے باہر کردیا۔