ریاض :سعودی حکام نے کہا ہے کہ سعودی عرب میں معتمرین کی آمدورفت کیلئے کوئی ائیرپورٹ مخصوص نہیں،عمرہ زائرین کسی بھی ائیرپورٹ سے سعودی عرب آ سکتے ہیں۔
سعودی وزارت حج و عمرہ نے بتایاکہ عمرے کیلئے آنے والے زائرین سعودیہ میں 90 دن قیام کر سکتے ہیں۔ حکام کے مطابق سعودی عرب میں اپنے قیام کے دوران عمرہ زائرین مکہ مکرمہ اور مدینہ منورہ سمیت دیگرسعودی شہروں میں آزادی سے جاسکتے ہیں۔
علاوہ ازیں سعودی وزارت صحت اور وزارت حج و عمرہ نے زائرین کو صحت خدمات کی فراہمی کے لیے مفاہمتی یادداشت پر دستخط کیے ہیں۔
مفاہمتی یادداشت کے مطابق حج اور عمرے پر آنے والوں کو وزارت صحت صحت مشاورت فراہم کرنے کے ساتھ حفظان صحت کی سہولتیں مہیا کرنے کا اہتمام کرے گی جبکہ وزارت حج و عمرہ انتظامات کی نگرانی کرے گی۔
دوسری جانب وزارت صحت اور وزارت حج و عمرہ کے اہلکاروں کی پیشہ ورانہ استعداد بہتر بنانے کا بھی فیصلہ کیا گیا ہ۔ مفاہمتی یادداشت کے تحت طے کیا گیا ہے کہ مختلف اقدامات کے ذریعے صحت تجربات کا تبادلہ ہوگا۔
دونوں وزارتیں اپنے اپنے دائرے میں زائرین کو مختلف سہولتیں فراہم کریں گی۔ اس حوالے سے پیش آنے والی مشکلات اور مسائل بھی حل کیے جاُئیں گے۔