چیئرمین این ڈی ایم اے نے کہاہے کہ سمندری طوفان کے خدشے کے باعث تمام اداروں کو الرٹ جاری کر دیا ہے۔
ان کا کہنا تھا کہ بیپر جوائے کی سمت شمال اور شمال مشرق کی طرف ہوتی نظر آ رہی ہے،15جون دوپہر کو کیٹی بندر کے علاقوں میں بیپر جوائے پہنچ جائے گا۔
چیئرمین این ڈی ایم اے نے کہا کہ بیپر جوائے کے پھیلاؤ سے جنوبی سندھ اور جنوبی مشرقی سندھ کے علاقے متاثر ہونے کا امکان ہے۔
دوسری جانب سمندری طوفان کے پیش نظر کیٹی بندر کو خالی کرا دیا گیا ہے، تمام مارکیٹس اور بازار بند کروا دیے گئے ہیں اور لوگوں کی نقل مکانی کا سلسلہ جاری ہے۔
وزیراعلیٰ سندھ مراد علی شاہ کا کہنا ہے کہ شہریوں کو محفوظ مقامات پر منتقلی کا عمل جاری ہے،سندھ کے ساحلی علاقوں میں تیز بارش کا امکان ہے، کراچی میں بل بورڈز ہٹائے جا رہے ہیں، ان کا کہنا تھا کہ کے الیکٹرک سے کہاہے کہ صورتحال پر نظر رکھیں۔
وزیراعلیٰ کا کہنا تھا کہ عوام گھروں کے دروازے اور کھڑکیاں بند رکھیں،سجاول،کیٹی بندر میں بارش ہورہی ہے، ان کاکہنا تھا کہ ممکن ہے طوفان کا رخ تبدیل ہوجائے یا شدت میں کمی آ جائے،جمعہ اور ہفتہ اہم ہیں،لوگ گھروں میں رہیں۔