گرمی ہے کہ کم ہونے کا نام نہیں لے رہی اور دوسری طرف بجلی کی قیمت ہے جس میں روز روز کے اضافے نے غریب کی کمر توڑ کر رکھ دی ہے۔ لوگ اب پنکھا بھی سوچ سمجھ کر چلاتے ہیں تا کہ بجلی کا بل کم آئے۔ اس لئے آج ہم آپ کو ایسے پنکھوں کے بارے میں بتا رہے ہیں جو جدید بھی ہیں اور آپ کے بجلی کا بل بھی کم آئے گا۔
آج کل بازار میں سب سے زیادہ بکنے والے پنکھوں میں انورٹر پنکھے سرفہرست ہیں۔ یہ پنکھے عام پنکھوں کے مقابلے میں کم بجلی کھینچتے ہیں۔ ایک عام پنکھا جہاں 75 واٹ بجلی کھینچتا ہے وہیں انورٹر پنکھا 4 واٹ سے شروع ہو کر زیادہ سے زیادہ 50 واٹ تک بجلی میں ٹھنڈی ہوا فراہم کرتا ہے۔
انورٹر پنکھوں کے اندر ایک کٹ لگائی جاتی ہے اور ان میں سولر پینل یا یو پی ایس سے چلنے کے لئے وائرنگ بھی موجود ہوتی ہے۔ ان پنکھوں کی ایک خاصیت یہ بھی ہے کہ یہ ریموٹ سے چلتے ہی اس لئے بار بار کم یا زیادہ کرنے کے لئے اٹھنا نہیں پڑتا۔
ایک اور خاص بات یہ ہے کہ اس میں لگی کٹ کی وجہ سے یہ پنکھا آواز نہیں پیدا کرتا یعنی اگر اسپیڈ کم بھی ہوگی تو یہ بغیر آواز پیدا کیے چلتا رہے گا۔
حیرت انگیز بات یہ ہے کہ ان پنکھوں کی قیمت عام پنکھوں سے بہت زیادہ نہیں ہے۔ بازار میں انورٹر فین کی قیمت 10 ہزار سے شروع ہوتی ہے جو سائز اور کوالٹی کے حساب سے بڑھ جاتی ہے۔