جگنوؤں کے رات کو جگمگانے کے بارے میں توآپ نے اکثر سنا ہوگا لیکن اب سائنسدانوں نے دعویٰ کیا ہے کہ بلیوں میں بھی رات کو جگمگانے کی صلاحیت ہوتی ہے۔
آسٹریلیا میں ہونے والی ایک تحقیق کے بعد سامنے آنے والے حیرت انگیز دعوے کے مطابق بلیوں سمیت 125 اقسام کے جاندار الٹرا وائلٹ روشنی میں جگمگانے کی صلاحیت رکھتے ہیں۔
ماہرین کا کہنا ہے کہ تحقیق کے دوران متعدد جانوروں میں اس کا مشاہدہ کیا گیا اور یہ بھی دریافت ہوا کہ انسانی جسم بھی یہ صلاحیت رکھتا ہے تاہم یہ واضح نہیں کہ ممالیہ جانداروں میں موجود اس صلاحیت کا کوئی حیاتیاتی کردار ہوتا ہے یا نہیں۔
سائنسدانوں کا کہنا ہے کہ ابھی یہ بھی واضح نہیں کہ ایسا کیوں ہوتا ہے مگر ممکنہ طور پر اس سے جانداروں کو اپنے ہم جنسوں سے رابطے میں مدد ملتی ہے تاہم راتوں کو جاگنے والے جانداروں میں یہ صلاحیت زیادہ عام ہوتی ہے اور ان کے جسم سے پھوٹنے والی روشنی بھی زیادہ ہوتی ہے۔
سائنسدانوں نے 1911 میں سب سے پہلے دریافت کیا تھا کہ انسان اور خرگوش الٹرا وائلٹ شعاعوں میں اپنے جسم سے روشنی خارج کرتے ہیں۔ اس کے بعد بھی برسوں سے اس حوالے سے تحقیقی کام کیا جا رہا تھا، اس تحقیق کے نتائج جرنل رائل سوسائٹی اوپن سائنس میں شائع ہوئے۔