انڈیا کے شہر پونے میں قتل کی کوشش کا ایک انوکھا واقعہ پیش آیا ہے جہاں ایک شخص نے اپنی اہلیہ کو کیلشیئم کے کیپسول میں بلیڈ کے ٹکڑے ڈال کر کھلا دیے۔
انڈین ایکسپریس کے مطابق 45 سالہ سومناتھ سادھو نے اپنی اہلیہ کو قتل کرنے کے لیے کیپسول کے اندر بلیڈ کے ٹکڑے ڈال کر کھلا دیے۔ خاتون کو ہسپتال منتقل کیا گیا جہاں سرجری کے بعد ڈاکٹرز اُن کی جان بچانے میں کامیاب ہوگئے۔اُتم نگر پولیس کا جمعرات کو کہنا تھا کہ ملزم پیشے کے اعتبار سے حجام ہے اور اُسے اقدام قتل کے مقدمے میں گرفتار کر لیا گیا ہے۔انسپیکٹر کرن بلوادکر نے میڈیا کو بتایا کہ ’تحقیقات سے پتا چلتا ہے کہ شوہر اور اہلیہ کے درمیان گھریلو ناجاقی چل رہی تھی اور حال ہی میں دونوں کے بیچ جھگڑے بھی ہوئے تھے۔ کچھ دن قبل اہلیہ کے پیٹ میں درد اٹھا اور میڈیکل ٹیسٹ کے بعد معلوم ہوا کہ اُس کی وجہ اُن کے پیٹ میں موجود بلیڈ کے ٹکڑے ہیں جنہیں ڈاکٹرز نے ایک سرجری کے ذریعے باہر نکالا۔‘پولیس کے مطابق مزید تحقیقات کے نتیجے میں یہ بات سامنے آئی کہ سومناتھ سادھو نے کیلشیم کے کیپسول کے اندر بلیڈ کے ٹکڑے ڈالے اور اپنی اہلیہ کو کھلا دیے۔پولیس کا مزید کہنا ہے کہ ’تفتیش کے دوران یہ بھی معلوم ہوا کہ اکتوبر میں سومناتھ سادھو نے اپنی اہلیہ کو پانچ مرتبہ ایسے کیپسول کھلائے۔‘ملزم کے خلاف اقدامِ قتل، گھریلو تشدد اور خواتین پر ظلم کرنے کی دفعات کے تحت مقدمہ درج کرلیا گیا ہے۔