زرداری سب کچھ نچوڑ لیں گے، ن لیگ کا یہ آخری اقتدار ہے، فیصل واوڈا

سابق وفاقی وزیر فیصل واوڈا نے کہا ہے کہ وزیراعظم بنانے کی جنگ میں آصف زرداری سب کچھ نچوڑ لیں گے، مسلم لیگ ن کا یہ آخری اقتدار ہے۔

نجی ٹی وی چینل پر انٹرویو دیتے ہوئے انہوں نے 2024 کے عام انتخابات کے نتائج سے متعلق اظہار خیال کیا۔ انہوں نے کہا کہ  پاکستان میں جو کچھ ہوا، کوئی نئی چیز نہیں، الیکشن 2024 کو جوڈیشل سلیکشن کہتا ہوں۔

فیصل واوڈا کا کہنا تھا کہ آصف زرداری کی سیاست بہت مختلف ہے، وہ اس گیم کے ماسٹر ہیں۔ میرا خیال ہے کہ وہ وزیراعظم کے عہدے کے علاوہ سب کچھ نچوڑ لیں گے۔ ن لیگ کا یہ آخری اقتدار ہے، اسکے بعد یہ اقتدار میں نہیں آئیں گے۔

شہباز شریف کی آصف زرداری سے اہم ملاقات

وزیراعظم کے سوال پر انہوں نے کہا کہ یہ عہدہ مسلم لیگ ن کے کسی منتخب کردہ کو ملے گا، شاید شہباز شریف ہوں۔ اگر نواز شریف وزیراعظم بنے تو مریم نواز وزیراعلیٰ پنجاب ہونگی۔

انہوں نے کہا کہ چیئرمین پی ٹی آئی بیرسٹر گوہر خان وفاق میں تو حکومت نہیں بنا سکتے، چاند پر ضرور حکومت بناسکتے ہیں۔

فیصل واوڈا نے مزید کہا کہ سب سے پہلے پتہ کرنا ہوگا پاکستان یہاں تک کیسے پہنچا؟ وہ کون ہے جس کی وجہ سے پاکستان آج اس حالت میں پہنچا، وہ کون ہے جنہوں نے آئین و قانون کی ٹھیکیداری اٹھائی ہوئی ہے۔