ریاض ۔11مارچ (اے پی پی):سعودی عرب کے فرمانروا،خادم الحرمین الشریفین شاہ سلمان بن عبدالعزیز نے کہا ہے کہ ہمارے لیے تکلیف کا باعث ہے کہ رمضان المبارک ایسے وقت میں آ یا ہے جب ہمارے فلسطینی بھائی جارحیت کا سامنا کر رہے ہیں۔
ایس پی اے کے مطابق شاہ سلمان نے ماہ مبارک کی آمد پر مملکت کے شہریوں، مقیمین اور تمام مسلمانوں کو مبارکباد دی ، اپنے پیغام میں انہوں نے زور دیا کہ بین الاقوامی برادری فلسطین میں وحشیانہ جرائم کو روکنے، محفوظ انسانی اور امدادی راہداریاں کھولنےکی ذمہ داری پوری کرے۔انہوں نے مملکت کی حدود کی حفاظت کرنے والے عسکری، سکیورٹی اداروں کے اہلکاروں اور وطن کی خدمت میں مصروف مختلف محکموں سے تعلق رکھنے والے تمام سرکاری ملازمین کو ماہ مبارک کی خصوصی مبارکباد دی۔شاہ سلمان نے کہا کہ ہم اللہ کا شکر ادا کرتے ہیں جس نے اس ملک کو اسلام کا سرچشمہ بنایا، جہاں سے اسلام کا پیغام پوری دنیا میں پھیلا اور ہمیں الحرمین الشریفین اور ان کے زائرین کی خدمت کا موقع دیا۔پیغام کے آخر میں مملکت کے امن اور خوشحالی قائم رہنے اور روزہ داروں کے روزے قبول ہونے کی دعا کی