کینبرا۔14مارچ (اے پی پی):آسٹریلوی ریاست وکٹوریہ میں سونے کی کان منہدم ہونے سے ایک شخص ہلاک اور 29 مزدوروں کو بچا لیا گیا۔ فرانسیسی خبر رساں ادارے اے ایف پی کے مطابق وکٹوریہ پولیس نے جمعرات کو بتایا کہ گزشتہ شام کو بلارٹ قصبے کے قریب سونے کی کان ماؤنٹ کلیئر میں کان کنی کی سرنگ کے اندر چٹان گرنے کی اطلاع موصول ہوئی جس کے باعث2 افراد پتھروں میں پھنس گئے جبکہ 28 کارکن ایک حفاظتی پوڈ میں پناہ لینے میں کامیاب ہو گئے۔
پولیس نے بتایا کہ پھنسے ہوئے کارکنوں میں سے ایک کو بچا لیا گیا اور اسے تشویش ناک حالت میں ہسپتال منتقل کیا گیا جبکہ جمعرات کی صبح ایک 37 سالہ شخص کی نعش برآمد ہوئی۔ پناہ لینے والے 28 کان کنوں کو بحفاظت نکال لیا گیا ۔