پولیس اسٹیشن کے لاک اپ میں مردہ پائے جانے والے خلیل سولنگی کے ماورائے عدالت قتل کیس میں عبوری ضمانت مسترد ہونے پر تھانہ سیہون کے سابق ایس ایچ او سمیت 6 پولیس اہلکار عدالت کے احاطے سے فرار ہو گئے۔
عدالت کے حکم سنائے جانے کے وقت ملزمان، انکوائری افسر اور عدالت میں موجود پولیس اہلکاروں کی بڑی تعداد کے سامنے خاموشی سے باہر نکل گئے اور اپنی گاڑیوں میں سوار ہو کر بھاگ گئے۔
ملزمان کے فرار پر پولیس اہلکاروں کو اسی حوالات میں بند کردیا گیا
یاد رہے کہ 31 جولائی کو خلیل سولنگی سیہون پولیس اسٹیشن کے لاک اپ میں مبینہ تشدد سے جاں بحق ہوا تھا ، عدالتی حکم پر مقتول کی والدہ کی درخواست پر پولیس اہلکاروں کے خلاف مقدمہ درج کیا گیا تھا۔
جن پولیس اہلکاروں کے خلاف مقدمہ درج کیا گیا ان میں سابق ایس ایچ او مظہر نائچ، ہیڈ کانسٹیبل امان اللہ ملاح، کانسٹیبل منظور علی منگنہر، مبین ہالیپوٹو، بشیر احمد ابڑو اور امتیاز علی میمن شامل ہیں۔