انڈین فضائی کمپنی ایئر انڈیا نے کہا ہے کہ تمام بوئنگ طیاروں کے فیول کنٹرول سوئچز کا معائنہ مکمل کر لیا گیا ہے اور ’کوئی مسئلہ‘ سامنے نہیں آیا۔خبر رساں ادارے ایسوسی ایٹڈ پریس کی رپورٹ کے مطابق ایئر لائن نے جاری بیان میں کہا ہے کہ تمام جہازوں کا معائنہ کیا گیا ہے اور فیول کنٹرول سوئچ کے لاکنگ کے طریقہ کار میں کوئی مسئلہ نظر نہیں آیا۔ایئر انڈیا کے بوئنگ طیارے ڈریم لائنر 787 کی ابتدائی تحقیقات میں یہ بات سامنے آئی تھی کہ طیارے کے دونوں انجنوں تک ایندھن کی ترسیل کنٹرول کرنے والے سوئچز بند ہو گئے تھے جو پرواز کے فوراً بعد ہی طیارے کے گرنے کی وجہ بنے۔ڈریم لائنز 787 گزشتہ ماہ 12 جون کو احمد آباد ایئر پورٹ کے قریب گر کر تباہ ہو گیا تھا جس میں سوار 242 افراد ہلاک ہو گئے تھے جبکہ ایک مسافر معجزاتی طور پر زندہ بچ گیا تھا۔دوسری جانب امریکی اخبار وال سٹریٹ جرنل نے اپنی تحقیقاتی رپورٹ میں کہا تھا کہ جہاز کے فیول کنٹرول سوئچز 56 سالہ کیپٹن نے بند کیے تھے۔طیارہ حادثے کی انڈین رپورٹ کا جائزہ لینے والے امریکی عہدیداروں سے واقف افراد نے وال سٹریٹ جرنل کو بتایا تھا کہ دو پائلٹس کے درمیان کاک پٹ میں ہونے والی بات چیت کی ریکارڈنگ سے معلوم ہوتا ہے کہ جہاز کے دونوں اینجنز تک ایندھن کی ترسیل کو کنٹرول کرنے والے سوئچز کو کیپٹن نے بند کر دیا تھا۔رپورٹ کے مطابق بوئنگ طیارے 787 ڈریم لائنر کے رن وے سے ٹیک آف کے دوران فرسٹ آفیسر پائلٹ نے زیادہ تجربہ کار کیپٹن سے پوچھا کہ انہوں نے ’سوئچ کو کٹ آف پوزیشن پر کیوں کر دیا۔‘رپورٹ کے مطابق فرسٹ آفیسر پائلٹ نے حیرت کا اظہار کیا اور پھر گھبرا گئے جبکہ ریکارڈنگ سے ایسا معلوم ہوتا ہے کہ کیپٹن نے اس سوال پر کسی قسم کی پریشانی ظاہر نہیں کی بلکہ پرسکون رہے۔
رپورٹ کے مطابق طیارے کے انجن کو ایندھن کی ترسیل منقطع ہو گئی تھی۔ فوٹو: اے ایف پی
گزشتہ ہفتے انڈین ایوی ایشن ریگولیٹر نے تمام ایئر لائنز کو بوئنگ طیاروں کے مختلف ماڈلز کے فیول کنٹرول سوئچز کا معائنہ کرنے اور 21 جولائی تک رپورٹ جمع کروانے کا کہا تھا۔
ایئر انڈیا کے بیڑے میں 33 ڈریم لائنرز موجود ہیں جبکہ ایئر انڈیا ایکسپریس کے پاس 75 بوئنگ 737 طیارے موجود ہیں۔گزشتہ روز منگل کو ہانگ کانگ سے دہلی آنے والی ایئر انڈیا کی پرواز اے آئی 315 اندرا گاندھی انٹرنیشنل ایئرپورٹ پر لینڈنگ کے فوراً بعد حادثے کا شکار ہو گئی تھی جب طیارے میں آگ بھڑک اٹھی۔ تاہم حادثے میں تمام مسافر اور جہاز کا عملہ محفوظ رہا۔
ایئر انڈیا کی جانب سے جاری کردہ بیان میں کہا گیا تھا کہ، ’پرواز اے آئی 315 کے آکسیلیری پاور یونٹ (APU) میں آگ لگ گئی جب وہ لینڈنگ کے بعد گیٹ پر کھڑی تھی۔ جیسے ہی واقعہ پیش آیا، طیارے کا اے پی یو خودکار نظام کے تحت بند ہو گیا۔‘
بیان میں مزید کہا گیا کہ ’اس واقعے کے دوران مسافروں کا طیارے سے اترنے کا عمل جاری رہا، اور تمام افراد محفوظ طریقے سے باہر نکل گئے۔ طیارے کو نقصان پہنچا ہے، اور اسے مزید تحقیقات کے لیے گراؤنڈ کر دیا گیا ہے۔‘
اس سے قبل ایئر انڈیا پیر کو بھی دو مختلف پروازوں کے حادثات کی وجہ سے خبروں میں رہی۔ ایک کولکتہ جانے والی پرواز کو دہلی ایئرپورٹ پر ٹیک آف سے قبل تکنیکی خرابی کے باعث روک دیا گیا۔
اسی روز، کوچی سے ممبئی جانے والی پرواز خراب موسم کے باعث لینڈنگ کے دوران رن وے سے اتر گئی تھی۔