"بھائی، اپنا خیال رکھنا، شاید اس بار میں تمہیں راکھی نہ باندھ سکوں۔ میں بہت تھک چکی ہوں، اب برداشت نہیں ہوتا۔ میرا شوہر شراب پی کر روز مارتا ہے، مجھے گالیاں دیتا ہے، دوسروں کے سامنے بے عزت کرتا ہے۔ وہ اور اس کے گھر والے مجھے جینے نہیں دے رہے۔ پلیز… انہیں کبھی معاف نہ کرنا۔ میری موت کا سبب یہی لوگ ہیں۔"
یہ دل دہلا دینے والا آخری پیغام آندھرا پردیش کی 24 سالہ لیکچرار سری ودیا نے اپنی جان لینے سے پہلے اپنے بھائی کے نام لکھا، جو اب بھارتی معاشرے میں عورت کے خلاف بڑھتے تشدد اور جہیز کے مطالبات پر ایک کڑوی بحث کو جنم دے چکا ہے۔
کرشنا ضلع کی رہائشی سری ودیا نے چھ ماہ قبل شادی کی تھی۔ لیکن شادی کے صرف چند ہفتوں بعد ہی وہ بدسلوکی، جسمانی تشدد اور روزانہ کی تذلیل کا شکار ہونے لگی۔ اہلِ خانہ کے مطابق، ایک مہینے کے اندر ہی حالات اتنے بگڑ چکے تھے کہ سری ودیا مکمل طور پر ذہنی طور پر ٹوٹ چکی تھی۔
خودکشی سے پہلے لکھے گئے خط میں سری ودیا نے واضح طور پر اپنے شوہر اور سسرالیوں کو اس قدم کا ذمہ دار ٹھہرایا۔ اس نے اپنے الفاظ میں اس عذاب کی جھلک دی جو وہ ہر روز جھیل رہی تھی, شراب کے نشے میں دھت شوہر کی مارپیٹ، بار بار کی تذلیل، اور وہ گھر جس نے اسے کبھی بیٹی، بیوی یا انسان سمجھا ہی نہیں۔
سری ودیا کی موت اب صرف ایک واقعہ نہیں رہی بلکہ پورے سماج کے ضمیر کو جھنجھوڑنے والی حقیقت بن گئی ہے۔ تعلیم یافتہ، خود مختار اور محنتی ہونے کے باوجود وہ اپنی عزتِ نفس اور سکون کے لیے مسلسل لڑتی رہی، مگر آخرکار وہ ہار گئی۔ پولیس نے واقعے کی تحقیقات شروع کر دی ہیں اور شوہر و دیگر سسرالیوں کے خلاف قانونی کارروائی کی تیاری کی جا رہی ہے۔