بھارتی ریاست آندھرا پردیش میں ایک نوبیاہتا دلہن کی پراسرار موت نے خوشی کے موقع کو ماتم میں بدل دیا۔ شادی کے صرف چند گھنٹے بعد پیش آنے والے اس واقعے نے دونوں خاندانوں کو شدید صدمے میں مبتلا کر دیا ہے۔
22 سالہ ہرشیتا کی شادی کرناٹک کے ایک نوجوان سے روایتی جوش و خروش کے ساتھ ہوئی۔ شادی کے موقع پر ہر طرف خوشی کا سماں تھا، دلہا دلہن خوش نظر آ رہے تھے اور رسم و رواج کا سلسلہ بھی معمول کے مطابق جاری تھا۔ شادی کے بعد دونوں میاں بیوی دلہن کے گھر ہی موجود تھے، جہاں دیگر رسمیں مکمل کی جا رہی تھیں۔
اسی دوران ہرشیتا اپنے کمرے میں گئی اور دروازہ اندر سے بند کر لیا۔ جب طویل وقت گزرنے کے بعد بھی کوئی جواب نہ ملا تو اہلخانہ نے دروازہ توڑ کر اندر داخل ہونے کا فیصلہ کیا۔ اندر کا منظر دل دہلا دینے والا تھا, ہرشیتا کی لاش پنکھے سے لٹک رہی تھی۔
اہلخانہ نے فوری طور پر اُسے اسپتال منتقل کیا، مگر ڈاکٹرز نے تصدیق کی کہ وہ دم توڑ چکی ہے۔ موت کی خبر سنتے ہی گھر میں کہرام مچ گیا، جہاں کچھ ہی گھنٹے پہلے خوشی کے نغمے گونج رہے تھے، اب فضا ماتم سے بھر گئی۔
فی الحال خودکشی کی کوئی ٹھوس وجہ سامنے نہیں آئی۔ شادی کی تصاویر میں ہرشیتا مکمل طور پر مطمئن اور مسکراتی ہوئی دکھائی دیتی ہے، جس سے اندازہ لگانا مشکل ہے کہ وہ کسی ذہنی دباؤ یا پریشانی کا شکار تھی۔
پولیس نے واقعے کا مقدمہ درج کر کے تحقیقات کا آغاز کر دیا ہے۔ لاش کو پوسٹ مارٹم کے لیے بھیج دیا گیا ہے جبکہ دونوں خاندانوں کے بیانات بھی ریکارڈ کیے جا رہے ہیں تاکہ یہ معلوم کیا جا سکے کہ آخر وہ کون سے عوامل تھے جنہوں نے ایک نئی زندگی کی شروعات کرنے والی لڑکی کو اس انتہائی قدم پر مجبور کیا۔
یہ افسوسناک واقعہ اس بات کی یاد دہانی ہے کہ ظاہری خوشی اکثر اندرونی کشمکش کو چھپا لیتی ہے، اور کئی بار وہ مسکراہٹیں بھی دکھاوے کی ہوتی ہیں جو ہمیں سب کچھ ٹھیک ہونے کا تاثر دیتی ہیں۔