طورخم سرحدی گزرگاہ سے افغان پناہ گزینوں کی وطن واپسی کا سلسلہ بدستور جاری ہے۔ امیگریشن حکام کے مطابق گزشتہ روز پی او آر (پروف آف رجسٹریشن) کارڈ رکھنے والے 505 افغان شہری رضاکارانہ طور پر افغانستان واپس چلے گئے۔
حکام کے مطابق یکم اگست سے اب تک پی او آر کارڈ ہولڈرز کی واپسی کی مجموعی تعداد 925 ہو چکی ہے۔ اس کے علاوہ گزشتہ روز افغان سٹیزن کارڈ رکھنے والے مزید 58 افراد بھی اپنے وطن لوٹے۔
امیگریشن حکام کا کہنا ہے کہ طورخم کے راستے واپس جانے والوں میں وہ افغان شہری بھی شامل ہیں جو بغیر کسی قانونی سفری دستاویزات کے پاکستان میں مقیم تھے۔ گزشتہ روز ایسے 643 افغان باشندوں کو ملک بدر کیا گیا۔
حکام نے بتایا کہ اب تک مجموعی طور پر 43 ہزار 944 افغان سٹیزن کارڈ رکھنے والے افغان شہری وطن واپس جا چکے ہیں۔