مون سون بارشوں اور گلیشیئرز پگھلنے کے نتیجے میں پنجاب کے دریاؤں میں پانی کے بہاؤ میں نمایاں اضافہ ریکارڈ کیا گیا ہے۔
ترجمان پی ڈی ایم اے کے مطابق دریائے سندھ میں کالا باغ اور چشمہ بیراج پر درمیانے درجے کا سیلاب جبکہ تربیلا اور تونسہ بیراج پر نچلے درجے کا سیلاب ہے۔ دریائے ستلج میں گنڈا سنگھ والا کے مقام پر پانی کا بہاؤ 68 ہزار کیوسک تک پہنچ گیا ہے جہاں نچلے درجے کا سیلاب برقرار ہے۔
دریائے جہلم اور دریائے چناب میں صورتحال فی الحال معمول کے مطابق ہے تاہم نالہ پلکھو کینٹ اور نالہ بسنتر میں نچلے درجے کا سیلاب جاری ہے۔ دریائے راوی کے بیشتر مقامات پر بہاؤ نارمل ہے۔
ڈیمز کی صورتحال کے حوالے سے ترجمان پی ڈی ایم اے نے بتایا کہ تربیلا ڈیم 98 فیصد جبکہ منگلا ڈیم 68 فیصد تک بھر چکا ہے۔ تربیلا ڈیم کا لیول 1547.94 فٹ اور منگلا ڈیم کا لیول 1211.15 فٹ ریکارڈ کیا گیا ہے۔
ڈی جی پی ڈی ایم اے عرفان علی کاٹھیا نے شہریوں کو خبردار کیا ہے کہ وہ فوری احتیاطی تدابیر اختیار کریں۔ دریاؤں کے پاٹ میں موجود افراد کو ہدایت کی گئی ہے کہ وہ محفوظ مقامات پر منتقل ہو جائیں اور کسی بھی ہنگامی انخلا کی صورت میں انتظامیہ سے تعاون کریں۔
حکام نے شہریوں کو خبردار کیا ہے کہ دریاؤں، نہروں اور ندی نالوں میں نہانے سے گریز کریں جبکہ والدین اپنے بچوں کو کسی صورت دریاؤں یا نالوں کے قریب نہ جانے دیں۔ ایمرجنسی کی صورت میں شہری پی ڈی ایم اے پنجاب کی ہیلپ لائن 1129 پر رابطہ کریں۔