کوٹو ہائیڈرو پاور پراجیکٹ کی سکیورٹی پر مامور خیبر پختونخوا پولیس کے واجبات 73 کروڑ روپے سے تجاوز کر گئے لیکن پختونخوا انرجی ڈویلپمنٹ آرگنائزیشن کی جانب سے اب تک ادائیگیاں نہیں کی گئی۔
محکمہ پولیس کے ریکارڈ کے مطابق گزشتہ چھ سال سے سکیورٹی پر تعینات اہلکاروں کی تنخواہیں اور مراعات کی ادائیگی التوا کا شکار ہیں جبکہ پراجیکٹ ڈائریکٹر اور ڈی پی او تیمرگرہ کے درمیان ہونے والے معاہدے کے تحت اخراجات کی ذمہ داری پراجیکٹ انتظامیہ کی تھی۔
آڈیٹر جنرل کی رپورٹ میں بتایا گیا ہے کہ کوٹو ہائیڈرو پراجیکٹ کے تحت پولیس گارڈز کی تنخواہوں اور مراعات کی مد میں 73 کروڑ 52 لاکھ 95 ہزار 174 روپے واجب الادا ہیں جوکہ اب تک نہیں دیے گئے۔
رپورٹ کے کہا گیاہے کہ جنرل فنانشل رولز کے تحت کنٹرولنگ آفیسر کی ذمہ داری ہے کہ وہ حکومتی واجبات بروقت وصول کر کے پبلک اکاؤنٹ میں جمع کرے لیکن اس معاملے میں سنگین کوتاہی سامنے آئی ہے اور آڈٹ حکام نے اس رقم کی فوری وصولی کی سفارش کی ہے۔
آڈیٹر جنرل کے مطابق محکمہ پولیس سے یکم جنوری 2025 کو محکمانہ اجلاس بلانے کے لیے کہا گیا تھا لیکن رپورٹ کی تکمیل تک کوئی میٹنگ نہیں ہو سکی۔اس معاملے پر اکتوبر 2024 میں سوال اٹھائے جانے پر محکمہ کی جانب سے کہا گیا تھا کہ متعلقہ ریکارڈ کی جانچ پڑتال کے بعد تفصیلی جواب دیا جائے گا۔