وفاقی حکومت نے ملک میں غیر ملکی سرمایہ کاری بڑھانے اور کاروباری سرگرمیوں کے فروغ کے لیے نئی بزنس ویزہ پالیسی متعارف کرانے کا فیصلہ کیا ہے۔
وزارتِ داخلہ کے ذرائع کے مطابق اس پالیسی کے تحت پاکستان میں کاروبار کرنے والے غیر ملکی شہریوں کو باقاعدہ بزنس ویزے جاری کیے جائیں گے۔ نئی پالیسی کا مقصد سرمایہ کاروں کو سہولت فراہم کرنا اور ملک میں کاروباری مواقع بڑھانا ہے۔
ذرائع کے مطابق بزنس ویزہ رکھنے والے غیر ملکیوں کو ملٹی پل انٹری ویزہ دیا جائے گا جس کے ذریعے وہ بار بار اجازت کے بغیر پاکستان آ کر کاروباری سرگرمیاں جاری رکھ سکیں گے۔
اہم پیش رفت کے طور پر نئی پالیسی میں افغان شہریوں کو بھی بزنس ویزہ کی سہولت فراہم کی جائے گی جس سے وہ قانونی طور پر پاکستان میں کاروبار کر سکیں گے۔
وزارتِ داخلہ کے مطابق یہ اقدام قانونی کاروبار کے فروغ، اسمگلنگ اور غیر قانونی تجارت کی روک تھام کے لیے کیا جا رہا ہے۔ پالیسی کے ذریعے غیر ملکی کاروباری افراد کو ٹیکس نیٹ میں لانے اور ان کے کاروبار کو رجسٹرڈ کرنے کا عمل بھی آسان بنایا جائے گا۔
ذرائع کا کہنا ہے کہ بزنس ویزہ پالیسی کا مسودہ وزارتِ داخلہ اور وزارتِ خارجہ کی مشاورت سے تیار کیا جا رہا ہے جسے جلد وفاقی کابینہ کی منظوری کے لیے پیش کیا جائے گا۔
سرکاری ذرائع کے مطابق حکومت کا مقصد غیر ملکی سرمایہ کاری میں اضافہ، کاروباری ماحول کو بہتر بنانا اور علاقائی تجارتی تعلقات کو مزید مضبوط کرنا ہے۔