وفاقی وزیر برائے پارلیمانی امور طارق فضل چوہدری نے ایشیا کپ میں پاک بھارت میچ کے بعد بھارتی ٹیم کے رویے کو سخت تنقید کا نشانہ بنایا ہے۔ ان کا کہنا ہے کہ بھارتی کھلاڑیوں کا رویہ ذہنی تعصب کا عکاس ہے۔
ان کا کہنا تھا کہ معرکۂ حق میں شکست خوردہ بھارت اب کھیل کے میدان میں اپنے زخم چاٹ رہا ہے کیونکہ اسے بخوبی معلوم ہے کہ عددی اکثریت کے باوجود وہ جنگی میدان میں پاکستان کو شکست نہیں دے سکتا۔
انہوں نے کہا کہ بھارت نے کھیل کے میدان میں اخلاقی پستی کی بدترین مثال قائم کی ہے جس سے ان کی اپنی سبکی ہوئی ہے۔ بھارتی ٹیم اور میچ ریفری کے غیر ذمہ دارانہ رویے پر پاکستان کا احتجاج اور میچ ریفری کو ہٹانے کا مطالبہ درست ہے۔
وفاقی وزیر نے مزید کہا کہ بھارت کھیل کو کھیل کے بجائے سیاسی اور تعصب پر مبنی انداز میں لے رہا ہے جو کسی طور قابل قبول نہیں اور اسپورٹس مین اسپرٹ کے منافی ہے۔