"میں نے ہمیشہ اپنی شناخت کے بحران کے بارے میں کھل کر بات کی ہے۔ لوگ مجھے دیکھ کر کہتے، ‘یہ دیکھو، یہ تو فیروز خان کی بہن ہے’ یا ‘یہ حمیما ملک کی بہن ہے’۔ اکثر سوال کیا جاتا، ‘کیا آپ کے بہن بھائی آپ کا ساتھ نہیں دیتے؟ کیسا لگتا ہے حمیما ملک اور فیروز خان کی بہن ہونے پر؟’ میں نے اپنا کیریئر مارننگ شوز سے شروع کیا، تین سال پی ایس ایل ایونٹس ہوسٹ کیے اور انٹرنیشنل کھلاڑیوں کے انٹرویوز کیے۔ میں یہ سب اس لیے بتا رہی ہوں کہ ہر بہن بھائی مختلف ہوتا ہے۔ وہ لوگ انٹرٹینمنٹ میں زیادہ دلچسپی رکھتے تھے جبکہ میرا رجحان ہمیشہ کسی ایدھی یا مدر ٹریسا جیسا بننے کی طرف تھا۔ پھر کیوں ہمیں ایک دوسرے سے تقابل کیا جاتا ہے؟ لوگ پوچھتے ہیں ‘کیسا لگتا ہے اسٹار سسٹرز ہونے پر؟’ کچھ تو طنز بھی کرتے ہیں کہ ‘کیا آپ کے بہن بھائی آپ کو سپورٹ نہیں کرتے؟’ لیکن انہیں کیوں سپورٹ کرنا چاہیے؟ کیا انہوں نے مجھے سپورٹ کیا یا کریں گے؟ اور میں آپ کو کیوں بتاؤں؟ میں تو ایسی خاتون ہوں جو اپنے شوہر سے بھی سپورٹ نہیں لیتی۔"
پاکستانی ٹی وی کی معروف اینکر اور لائف کوچ دعا ملک نے حال ہی میں صبیح سمیر کے یوٹیوب چینل پر انٹرویو دیا جس میں انہوں نے پہلی بار کھل کر اپنے احساسات کا اظہار کیا۔ دعا ملک نے بتایا کہ کس طرح وہ ہمیشہ فیروز خان اور حمیما ملک کے سائے میں جی رہی ہیں اور لوگ انہیں صرف ایک بہن کے طور پر پہچانتے ہیں، نہ کہ ان کی اپنی شناخت سے۔
دعا ملک نے کہا کہ وہ ہمیشہ ایک الگ راستے پر چلتی رہی ہیں۔ جہاں ان کے بہن بھائی اداکاری اور شوبز میں مصروف ہیں، وہ خود لوگوں کی فلاح اور سماجی کاموں میں زیادہ دلچسپی رکھتی ہیں۔ انہوں نے مارننگ شوز، لائیو ایونٹس اور حتیٰ کہ پی ایس ایل جیسے بڑے پلیٹ فارمز پر اپنی صلاحیتوں کا لوہا منوایا۔
ان کے مطابق سب سے زیادہ تکلیف دہ بات یہ ہے کہ لوگ ہر بار ان کا موازنہ ان کے بہن بھائیوں سے کرتے ہیں۔ دعا ملک کا کہنا تھا کہ انہیں کسی کے سہارے کی ضرورت نہیں اور وہ اپنی پہچان اپنی محنت اور صلاحیتوں سے بنانا چاہتی ہیں۔
دعا ملک کے اس بیان نے سوشل میڈیا پر نئی بحث چھیڑ دی ہے۔ مداحوں نے جہاں ان کی ہمت اور کھلے دل سے بات کرنے کی تعریف کی، وہیں کچھ نے کہا کہ خاندان کے نام کے ساتھ جڑنا ہی بڑی پہچان ہے۔ تاہم، زیادہ تر صارفین نے ان کی جدوجہد کو سراہا اور کہا کہ وہ اپنی شخصیت کو خود منوانے کے لیے بھرپور کوشش کر رہی ہیں۔