حکومت خیبر پختونخوا نے ضلعی سطح پر ترقیاتی منصوبوں کے لیے تیز رفتار پائیدار ترقیاتی اقدامات کے نام سے خصوصی پروگرام شروع کرنے کا فیصلہ کرتے ہوئے تمام ڈپٹی کمشنرز کو فوری ہدایات جاری کر دی ہیں۔
محکمہ ترقی و منصوبہ بندی خیبر پختونخوا کی جانب سے جاری مراسلے کے مطابق تمام ڈپٹی کمشنرز اور ڈسٹرکٹ پلاننگ آفیسرز کو ہدایت دی گئی ہے کہ منظور شدہ گائیڈ لائنز پر سختی سے عمل درآمد یقینی بنایا جائے۔ ہر ضلع کو ہدایت کی گئی ہے کہ اپنی حدود میں سب اسکیموں کی نشاندہی کرکے ان کی تفصیلی معلومات مقررہ لاگت کے مطابق فراہم کرے۔
مراسلے میں کہا گیا ہے کہ سب اسکیموں کی تفصیلات محکمہ کو ای میل اور فائل دونوں صورتوں میں ارسال کی جائیں تاکہ بروقت پی سی ون اور انتظامی منظوری کے احکامات متعلقہ اضلاع تک پہنچائے جا سکیں۔
مزید ہدایت میں کہا گیا ہے کہ اس عمل کو فوری طور پر مکمل کیا جائے کیونکہ وزیراعلیٰ خیبر پختونخوا کی منظوری کے بعد یہ ہدایات جاری کی گئی ہیں اور تمام اضلاع کو اس معاملے کو "انتہائی فوری نوعیت" کا سمجھنے کی تاکید کی گئی ہے۔