کراچی و حیدرآباد سمیت سندھ کے مختلف اضلاع میں ہونے والے ضمنی بلدیاتی انتخابات میں پاکستان پیپلز پارٹی نے میدان مار لیا۔غیر سرکاری اور غیر حتمی نتائج کے مطابق 11 اضلاع میں چیئرمین اور وائس چیئرمین کی 23 نشستوں میں سے 17 نشستیں پیپلز پارٹی کے حصے میں آئیں جبکہ کراچی کی 5 میں سے 4 نشستیں بھی پیپلز پارٹی نے جیت لیں اور جماعت اسلامی ایک نشست حاصل کرنے میں کامیاب رہی۔
کراچی میں ضلع غربی، ٹی ایم سی اورنگی یوسی ون کی چیئرمین نشست پر پیپلز پارٹی کی شہنیلا عامر 3 ہزار 801 ووٹ لے کر کامیاب ہوئیں جبکہ تحریک لبیک کے امیدوار محمد علی 1 ہزار 787 ووٹ کے ساتھ دوسرے نمبر پر رہے۔
ضلع غربی منگھوپیر، یوسی 10 کی وائس چیئرمین نشست پیپلز پارٹی کے اسٹیفن مسیح نے 891 ووٹ لے کر جیت لی جبکہ اے این پی کے امیدوار احسن اللہ 324 ووٹ لے سکے۔
اسی طرح ضلع کیماڑی، ٹی ایم سی بلدیہ یوسی 8 میں پیپلز پارٹی کے محمد فیصل 3 ہزار 132 ووٹ لے کر کامیاب قرار پائے۔ آزاد امیدوار حسنین چوہان 1 ہزار 84 ووٹ لے کر دوسرے نمبر پر رہے۔
ضلع شرقی، سہراب گوٹھ یوسی 8 کی وائس چیئرمین نشست بھی پیپلز پارٹی کے شہروز احمد کے نام رہی جنہوں نے 1 ہزار 790 ووٹ حاصل کیے۔ جماعت اسلامی کے امیدوار آصف علی خان 73 ووٹ لے سکے۔
ضلع غربی، ٹی ایم سی اورنگی یوسی 7 کی جنرل وارڈ ممبر نشست پر جماعت اسلامی نے کامیابی حاصل کی۔ محمد بلال نصیر نے 791 ووٹ لے کر پیپلز پارٹی کے شیخ اظہر کو شکست دی جنہوں نے 749 ووٹ حاصل کیے۔
واضح رہے کہ ضمنی انتخابات سندھ کے 14 اضلاع کی 28 نشستوں پر ہوئے جن میں سکھر، خیرپور، گھوٹکی، حیدرآباد، مٹیاری، جامشورو، دادو، بدین، ٹھٹہ اور میرپور خاص بھی شامل ہیں۔