خیبرپختونخوا کے سیاحتی مقام ناران میں انتظامیہ نے غیر معمولی اقدام اٹھاتے ہوئے بغیر نکاح نامے کے آنے والے جوڑوں کے داخلے پر پابندی عائد کر دی ہے۔
تفصیلات کے مطابق پولیس نے ناران جانے والے راستوں پر ناکے قائم کر دیے ہیں جہاں آنے والے سیاحوں کی کڑی چیکنگ کی جا رہی ہے۔ جوڑوں کو ہوٹلوں میں قیام یا سیر و تفریح کی اجازت صرف اس صورت میں دی جائے گی جب وہ نکاح نامہ پیش کریں گے۔
پولیس حکام کا کہنا ہے کہ نکاح نامہ نہ رکھنے والے جوڑوں کو نہ صرف ناران میں داخل ہونے سے روکا جائے گا بلکہ ان کے خلاف قانونی کارروائی بھی کی جا سکتی ہے۔
انتظامیہ کے مطابق یہ فیصلہ مقامی روایات اور معاشرتی اقدار کے تحفظ کے ساتھ ساتھ غیر اخلاقی سرگرمیوں کی روک تھام کے لیے کیا گیا ہے۔ پولیس عملہ ہوٹلوں اور ریسٹ ہاؤسز میں قیام کرنے والے مہمانوں کی بھی باقاعدہ جانچ پڑتال کر رہا ہے تاکہ صرف شادی شدہ جوڑوں کو ہی رہائش کی اجازت دی جائے۔