شہرِ قائد کے مختلف علاقوں میں بارش کا سلسلہ شروع ہوگیا جس سے موسم خوشگوار ہوگیا۔
محکمہ موسمیات کے مطابق گرومندر، صدر، اولڈ سٹی ایریا، گارڈن، آئی آئی چندریگر روڈ، لیاقت آباد، ایف بی ایریا، ایف سی ایریا اور پرانی سبزی منڈی سمیت ملحقہ علاقوں میں ہلکی بارش ریکارڈ کی گئی ہے۔
محکمہ موسمیات کا کہنا ہے کہ ہوا کا کم دباؤ بھارتی گجرات کے قریب موجود ہے اور اسے بحیرہ عرب سے نمی کی صورت میں تقویت مل رہی ہے۔ امکان ظاہر کیا گیا ہے کہ یہ سسٹم مزید شدت اختیار کرکے ڈپریشن میں تبدیل ہوسکتا ہے۔
محکمہ موسمیات کے مطابق مذکورہ موسمی سسٹم کل تک شمالی بحیرہ عرب میں داخل ہوسکتا ہے جس کے بعد شہر میں مزید بارش کا امکان بڑھ جائے گا۔