سیکیورٹی فورسز نے خیبرپختونخوا کے ضلع اورکزئی میں خفیہ اطلاعات پر انٹیلی جنس بیسڈ آپریشن کے دوران بھارت کی حمایت یافتہ دہشتگرد فتنۃ الخوارج کے 19 شدت پسندوں کو ہلاک کردیا تاہم فائرنگ کے شدید تبادلے میں لیفٹیننٹ کرنل اور سیکنڈ اِن کمانڈ میجر سمیت 11 بہادر جوان جامِ شہادت نوش کر گئے۔
پاک فوج کے شعبۂ تعلقاتِ عامہ کے مطابق یہ آپریشن 7 اور 8 اکتوبر کی درمیانی شب کیا گیا جس میں دہشتگردوں کی موجودگی کی مصدقہ اطلاعات پر علاقے کو گھیرے میں لیا گیا۔ کارروائی کے دوران دہشتگردوں نے سیکیورٹی فورسز پر فائرنگ کی جس کا جوانوں نے بھرپور جواب دیا۔
آئی ایس پی آر کے مطابق آپریشن میں 19 بھارتی سرپرست خوارج مارے گئے جبکہ پاک فوج کے 11 جوانوں نے ملک و قوم کے دفاع میں اپنی جانیں قربان کر دیں۔
شہید ہونے والوں میں لیفٹیننٹ کرنل جنید عارف اور سیکنڈ ان کمانڈ میجر طیب راحت شامل ہیں جنہوں نے فرنٹ لائن سے قیادت کرتے ہوئے دشمن کا بہادری سے مقابلہ کیا۔
دیگر شہداء میں نائب صوبیدار اعظم گل ، نائیک عادل حسین ، نائیک گل امیر، لانس نائیک شیر خان ، لانس نائیک طالش فراز ، لانس نائیک ارشاد حسین ، سپاہی طفیل خان ، سپاہی عاقب علی اور سپاہی محمد زاہد شامل ہیں۔
آئی ایس پی آر کا کہنا ہے کہ علاقے میں کلیئرنس اور سینیٹائزیشن آپریشن جاری ہے تاکہ کسی بھی چھپے ہوئے دہشتگرد کو انجام تک پہنچایا جا سکے۔
ترجمان کے مطابق پاکستانی فورسز بھارتی سرپرستی میں چلنے والی دہشتگردی کے مکمل خاتمے کے لیے پرعزم ہیں جبکہ شہداء کی قربانیاں دہشتگردی کے خلاف قومی عزم کو مزید مضبوط بناتی ہیں۔
قوم نے اپنے ان بہادر سپوتوں کی قربانیوں کو سلام پیش کیا ہے جنہوں نے مادرِ وطن کی حفاظت میں اپنی جان نچھاور کر دی۔آئی ایس پی آر نے کہا کہ ہمارے شہداء کا خون رائیگاں نہیں جائے گا، پاکستان امن و استحکام کی راہ پر گامزن رہے گا۔