خیبر پختونخوا کے وزیراعلیٰ علی امین گنڈاپور کو عہدے سے ہٹانے سے متعلق گردش کرتی افواہوں کی صوبائی حکومت اور پاکستان تحریکِ انصاف کی قیادت نے سختی سے تردید کر دی۔
گزشتہ چند روز سے سوشل میڈیا پر یہ خبریں زیرِ گردش تھیں کہ صوبائی وزیر برائے اعلیٰ تعلیم سہیل آفریدی کو نیا وزیراعلیٰ بنانے کی تیاری کی جا رہی ہے۔ تاہم سہیل آفریدی نے ان تمام خبروں کو جھوٹا، بے بنیاد اور گمراہ کن قرار دے دیا۔
انہوں نے کہا کہ مجھ سے منسوب تمام خبریں حقائق کے منافی ہیں۔ وزیراعلیٰ خیبر پختونخوا علی امین گنڈاپور کو ہٹانے کا کوئی فیصلہ نہیں ہوا۔ صوبائی حکومت کی سطح پر اس حوالے سے کوئی بات چیت بھی نہیں کی گئی۔
سہیل آفریدی نے مزید کہا کہ علی امین گنڈاپور بانی پاکستان تحریک انصاف کے اعتماد یافتہ اور وفادار ساتھی ہیں اور وہی وزیراعلیٰ خیبر پختونخوا کے طور پر اپنے فرائض انجام دیتے رہیں گے۔
اسی حوالے سے پی ٹی آئی چیئرمین بیرسٹر گوہر نے بھی ردعمل دیتے ہوئے کہا کہ میڈیا پر پھیلائی جانے والی وزیراعلیٰ کی تبدیلی کی خبریں مکمل طور پر بے بنیاد ہیں۔ انہوں نے واضح کیا کہ پارٹی کی سطح پر اس حوالے سے کوئی فیصلہ نہیں ہوا۔